Pari ug mayor angay mag-istorya

CEBU, Philippines - Suportahan ni Cebu Archbishop Jose Palma ang kura paruko sa Santo Niño Roman Catholic Parish sa Lungsod sa Santa Fe subay sa laraw sa lokal nga kagamhanan nga pasakaan kini og kaso.

Matud ni Palma nga usa siya sa nipirma sa sulat ni Fr. Roy Bucag nga naghangyo kang Gobernador Hilario Davide III nga dili idayon ang Music Isla Festival atol sa  Semana Santa.

Buot sa arsobispo nga masayran ang tinuoray nga istorya kun nganong niabot sa punto nga ikiha ni Mayor Jose Esgana si Fr. Bucag, apan mas labing maayo nga dili na lang kini moabot sa korte.

Gipadayag sab niini nga iyang giila ang katungod sa munisipyo apan aduna usab katungod ang simbahan hinungdan dili angayan ang maong butang nga awayan.  Masaligon siya nga maresolbar sa kura paruko ug mayor ang kasungian, apan andam usab siyang mopatunga kun gikinahanglan.

Subay niini, misugyot og win-win solution si Bise Gob. Agnes Magpale kabahin sa maong isyu. Diin inay “wild music”, mas maayo nga religious music ang ipatukar sa music festival.

Wala pa magkaistorya silang Magpale ug Fr. Bucag ug buot niyang hinabion si  Mayor Esgana kabahin niini.

Gitataw sa bise gobernador nga angay irespeto ang kultura sa isla sa Bantayan lakip na ang “religious freedom”.

Samtang nahinabi na ni Gob. Hilario Davide III si Esgana diin sumala sa mayor nga na-“misinformed” lang ang publiko kabahin sa kalihukan.

Misaad sab ang mayor kaniya alang sa seguridad ug limpyohan ang dapit human sa kalihukan.

Si Davide nagkanayon nga angay usab nga magka-istorya ang matag habig ug dili na lang magkinihaay. Rowena D. Capistrano ug Le Phyllis F. Antojado (BANAT NEWS)