Tricycle drivers tiyabaw sa business permit

CEBU, Philippines - Nanawagan ang grupo sa mga tricycle drivers sa Dakbayan sa Mandaue ngadto sa kagamhanan sa pagtangtang sa business permit requirements alang sa renewal sa ilang prangkisa.

Si Glenn Antigua, Traffic Enforcement Agency of Mandaue (TEAM) chief for operations, niingon nga kini ang nag-una nga isyu nga gipadayag sa grupo sa mga  tricycle drivers ug mga operators association sa Barangay Canduman dihang ilang gipahigayon ang unang consultative meeting niadtong miaging semana.

Dugang ni Antigua nga ang maong kahugpungan nga gilangkuban sa 100 ka sakop ang nipadayag nga ang ilang kitaon sa matag adlaw nilang pagpamasahero ang dili gyud makasugakod sa bayranan alang sa paglukat ug sa pag-renew sa duha nila ka permits.

Gipadayag sa kahugpongan nga sila lang ang gikinahanglan gyud mokuha og business permit samtang ang ubang public transport drivers nga naglakip sa mga PUJ ug taxi ang wala malakip sa maong rekisitos.

Si Antigua niingon nga ang mga drayber sa Canduman ang naggasto og mokabat sa P2,000 sa matag pa-update nila sa ilang prangkisa ug laing P1,800 sa matag tuig sa renewal sa ilang business permit.

Gitataw sa mga drayber nga bug-at na kaayo ang ilang galastuhan kay gawas sa business permit, naa pay prangkisa unya mokuha pa sila og sedula, clearance ug uban pa.

Samtang gihatagan sab sa kagamhanan sa dakbayan og kahigayonan ang kolorum nga mga traysikol nga makakuha sa ilang prangkisa hangtud sa Pebrero 24 ug moabot na lang og 2,000 ka tricycle units ang tugutan nga makapamasahero. (/GMR)