Mga walay uyab tagdon sa Mandaue
CEBU, Philippines - Hatagan og espesyal nga pagtagad sa kagamhanan sa Dakbayan sa Mandaue ang mga walay hinigugma o mga nag-inusara sa kinabuhi niining adlawa subay sa kasaulogan sa Valentine’s Day kay magbutang sila og express lane ug libreng medical check-up.
Gipahibawo ni Mayor Luigi Quisumbing nga naglakip sa ilang itanyag nga serbisyo mao ang pagkuha og cedula, pagproseso og mga dokumento ug uban pa. Ingon man libreng check-up sama sa blood sugar, cholesterol ug uban pa nga paluyuhan sa city health ug sa UC Med.
Si Quality Management System head Christine Marie Bolanon niingon nga kadtong mga nag-inusarang lalaki ug babaye o walay hinigugma o kapikas sa kinabuhi mahimong moapil sa kalihukan.
“For those who feel loveless on Valentine’s Day, Mandaue City is here for you,” butyag pa ni Bolanon.
Hinoon giklaro ni City Health Officer Dr. Edna Seno nga dili lang mga single ang mahimong maka-avail sa maong mga serbisyo apan lakip na kadtong gusto sa mao nilang tanyag.
Dugang ni Seno nga gusto ni Mayor Quisumbing nga physically o internally fit ang usa ka tawo nga nakabati og pag-inusara pinaagi sa pagpa-check up.
Subay niini, adunay banda nga motukar sugod sa buntag hangtud sa gabii alang sa mga mo-avail sa serbisyo nga himoon sa city hall grounds. -/DILT (BANAT NEWS)
- Latest