Sugbo mopadala og tabang sa Surigao
CEBU, Philippines - Archbishop Jose Palma sa Archdiocese of Cebu makig-alayon karon sa Caritas Cebu alang sa pagpreparar og hinabang alang sa mga nabiktima sa 6.7 magnitude nga linog sa Surigao Del Norte.
Matud pa ni Palma, makig-alayon pa siya sa Caritas Cebu aron makapadala na gilayon og tabang.
Sugod karong semanaha si Palma miingon nga adunay mga second collection nga ipahigayon sa mga simbahan sa Archdiocese of Cebu aron tigumon kini ug mapadala ngadto sa mga nabiktima sa linog.
Gitug-an sa arsobispo, gawas sa hinabang, giawhag usab niya ang katawhan uban kaniya sa pag-ampo ilabi na kanunay gihapon masinati sa maong lugar ang mga aftershocks ug iampo usab ang mga nakalas ug nangaangol.
Samtang ang Dakbayan sa Mandaue nagplanong mopadala og pinansiyal nga hinabang ngadto sa lokal sa kagamhanan sa Surigao del Norte.
Si Mayor Gabriel Luis Luigi Quisumbing miingon nga ang nahitabong linog sa Surigao nakapahinumdom sa mga Sugboanon sa nahitabong linog niadtong 2013 dinhi sa Central Visayas.
Ang kagamhanan sa Dakbayan sa Mandaue uban sa konseho pinangulohan ni Bise Mayor Carlo Fortuna nagkauyon nga mopadala og hinabang nga P100 mil ug ang posibleng pagpadala og rescuers. Rowena Capistrano ug Romeo T. Limpangog (BANAT NEWS)
- Latest