Sakyanan nidaro sa center island

CEBU, Philippines - Nabangga sa center island ug sa laing sakyanan sa may UN Avenue habig sa Brgy. Umapad, Dakbayan sa Mandaue ang usa ka brand new Mitsubishi nga sakyanan dihang ang drayber niini, nawad-an og control dihang adunay trailer truck nga ni-overtake. Nunot sa maong hitabo, nakasinati og grabeng paghuot sa trapiko ang maong  dalan nga milungtad og pipila ka oras una pa nahawan ang maong lugar. Nasulbad lang ang maong suliran dihang naabot ang mga traffic enforcer.

Ang drayber sa maong sakyanan nga si Danny Boy Espina, 35 anyos nga taga dalan S. Osmeña sa Brgy.  Gun-ob, Dakbayan sa Lapu-Lapu, luwas ra ang kahimtang matud pa ni PO1 Jeffrey Doquino nga maoy traffic investigator sa Mandaue City Police Office.

Nasayran nga ni-overtake ang trailer truck nga gimaneho ni Guillermo Rosacene, taga Daanbantayan, Cebu, empleyado sa Cebu Paragon Equipment Rental Corp. ngadto sa gimaneho ni Espina nga maoy hinungdan sa hitabo. (BANAT NEWS)