Uwan atol sa unang novena-mass “blessings” gikan sa langit

CEBU, Philippines - Wala makapugong ang pagbunok sa ulan sa bagang duot sa mga deboto ni Señor Santo Niño sa pagtambong sa labing unang novena-mass niini sa pilgrim center kagahapon sa sayo sa buntag human sa gipahigayong Walk with Jesus, ang opening salvo sa maong kalihukan.

Alas 4:15 sa kadlawon, hingpit nga gisugdan ang Walk with Jesus nga nanukad sa Fuente Osmeña Rotunda dayon subay sa Fuente Osmeña Boulevard paingon sa Basilica Minore del Santo Niño. Matag deboto nga niapil sa maong prosesyon, adunay bitbit sa mga klase-klase nga imahen sa Balaang Bata.

Gitug-an ni Fr. Pacifico Nohara Jr., OSA, ang rector sa Basilica nga unang higayon niyang niselebrar sa opening salvo isip rector. Alang niya daku kini kaayo nga gasa kay sa una sa dihang estudyante pa siya, kanunay lang siyang magsimbahan apan wala niya pamalandunga nga siya na usab diay ang mobarog sa atubangan ug mowali sa pulong sa Dios.

Sumala pa niiini nga gikan sa prosesyon hangtod sa santos nga misa pwerteng pagka daghana sa tawo diin nagpamatuod kini nga ang mga Sugbuanon ug Pilipino daku og pagtahod sa Balaang Bata gumikan sa daghang milagro nga niabot sa ilang kinabuhi.

Nanghinaut si Nohara nga ang tanang tawo nga naminaw sa pulong sa Dios, mohatag og panahon sa pagbisita sa Batang Hesus ug una nga ang tanang nitambong sa misa, mahuman nila ang siyam ka adlaw nga novena hangtod na sa misa sa Hubo.

Gitug-an sa rector sa basilica nga dili siya makahatag og gidaghanon sa mga nanambong sa Walk with Jesus apan malipayon siya kay bisan gawas na sa simbahan nakita gihapon niya ang bagang duot sa mga tawo nga nauwanan.

Gani matud sa mga deboto nga nahinabi sa Banat News  nga ang ulan nga ilang natagamtaman blessings kadto gikan sa kahitas-an nga kanunay mahitabo matag opening salvo.  Nunot niini gidayeg ni Konsehal Dave Tumulak ang deputy Mayor for Police Matters ang gipatumang seguridad sa kapolisan ug kasundaluhan lakip na ang ubang ahensiya sa gobyerno. Iya kining gihulagway nga "exemplary" ang gipatumang security preparations.  (BANAT NEWS)