Nihilak si Bato

CEBU, Philippines - Ang drug lord sa Leyte nga si Kerwin Espinosa mitug-an sa mga senador nga giingnan siya sa iyang kasosyo sa ilegal nga negosyo nga ang Sugboanong magpapatigayon nga si Peter Lim usa sa gikuhaan nila og suplay sa drugas.

Ang pamahayag ni Kerwin iyang gihimo samtang gisukit-sukit siya ni Senador Manny Pacquiao kun kinsa ang iyang supplier sa drugas atol sa gipahigayong Senate hearing kagahapon nga nagtuki sa pagpatay sa iyang amahan nga si kanhi Albuera mayor Rolando Espinosa Sr.

Matud ni Kerwin nga sa wala pa mapatay sa kapolisan ang kasosyo niya nga si Jeffrey Diaz alyas Jaguar, mitug-an kini kaniya nga si Peter Lim, usa ka tigbaligya og heavy equipment sa Sugbo, maoy usa sa ilang kuhaanan og shabu.

Apan gitataw ni Kerwin nga wala gayud sila magkita ni Peter Lim, kinsa daan na nga nakigkita ni Presidente Duterte didto sa Davao City ug nanghimakak og kalambigitan sa ilegal nga negosyo sa drugas.

Usa ka sakop sa pamilya ni Lim wala na gani ganahi motubag sa isyu kay gihulagway nila nga walay basehanan. Sa iyang pagpanubag sa pangutana sa mga senador, gitug-an ni Kerwin ang mga polis ug ubang opisyal nga nagdawatan kaniya og payola.

Gitug-an ni Kerwin nga apil gani si Superintendent Marvin Marcos, hepe sa PNP Criminal Investigation and Detection Group (CIDG) sa Eastern Visayas ug ang sakop niini nga si Chief Inspector Leo Laraga nagdawat kaniya og payola.

Matud ni Kerwin nga si Marcos nangayo kaniya og P3 milyones kay itabang sa iyang asawa nga nidagan pagka mayor sa Pastrana, Leyte. Si Kerwin miingon nga gihatag niya kang Marcos ang kantidad sa anam-anam nga paagi, bugti sa mga pabor sa iyang drug business.

Apan si Marcos kusganong nanghimakak sa pasangil ni Kerwin kaniya nga matud niya gituyo agi og panimalos tungod sa pagkapatay sa iyang amahan.

Si Chief Inspector Laraga gipasanginlan ni Kerwin nga maoy midemanda og kuwarta para kini kang Chief Supt. Vicente Loot, ang kanhi deputy regional director sa Police Regional Office-8.

Matud ni Kerwin nga naghatagan siya og binuwan nga payola nga tag P120 mil kang Laraga kay ang P20 mil para kaniya, ug ang P100 mil alang kang Loot.

Apan si Loot, mayor na karon sa lungsod sa Daanbantayan, Cebu nanghimakak nga nakadawat siya’g payola gikan kang Kerwin kay wala gani siya makaila kang Laraga, ug kun tinuod man nga naghatag og payola si Kerwin sa maong polis mahimong gigamit ra ang iyang ngalan.

Modul-an sa 20 ka polis nga sagad aktibo pa sa serbisyo, ang gihinganlan ni Kerwin nga nagdawatan kaniya og binuwan nga payola gikan sa iyang negosyo sa drugas.

Kini maoy nakapahilak ni PNP Chief Ronald “Bato” Dela Rosa atol sa hearing kay iyang nahunahuna ang kalisud diay sa kampanya pagsumpo sa ilegal nga drugas.

Ang nagpamahid sa luha nga si Dela Rosa mipasabot nga naguol kaayo siya kay bisan si Albuera police chief Jovie Espenido nga iyang gisaligan pag-ayo, apan naapil kini sa naduhigan og pagduda kay giingong mao kini ang nagsilbe nga taytayan aron si Kerwin magkaila ug si Ronnie Dayan nga driver-bodyguard ni kanhi Justice Secretary Leila De Lima nga karon usa na ka senador.

Si De Lima gipasanginlan nga apil sa nakadawat og drug money gikan kang Kerwin, pinaagi kang Dayan, nga bag-ohay pa lang nga iyang giangkon nga nahimo niyang boyfriend kaniadto. Ang kuwarta nga matud pa nadawat ni De Lima giingong gigamit sa kampanya.

Matud ni Kerwin nga miabot gyud og P8 milyones ang nahatag niya kang De Lima pinaagi kang Dayan, ug nagkakita gyud sila ni De Lima sa usa ka iladong hotel didto sa Baguio City kaniadtong Nobiyembre.

Si Kerwin miingon nga ang kinatibuk-ang P8 milyones nahatag niya kang Dayan sa wala pa ang piniliay kaniadtong Mayo 9 nga nakapadaog ni De Lima pagka senador.

Kusganon gyud hinoon nga nanghimakak si De Lima nga nakadawat siya og kuwarta gikan kang Kerwin. Atol sa hearing, si De Lima gihatagan unta sa iyang mga kaubang senador og higayon nga makasukit-sukit kang Kerwin, apan nahukman ni De Lima nga dili na niya kini himoon ug miingon nga gipasaylo na niya si Kerwin sa iyang “kabakakon.” (BANAT NEWS)