Local responders masaligan na

CEBU, Philippines – Paspas na ang pagresponde kung may emerhensiya sa kalungsuran gumikan kay aduna nay tagsatagsa ka responder ug mga Local Disaster Risk Reduction and Management Office (DRRMO).

Si Dennis Cortes, operations officer sa Provincial DRRMO, nagkanayon nga dili na maghuwat sa team gikan sa Kapitolyo kung dunay mahitabo.

Ang PDRRMO ang nibansay sa mga LDRRMO.

Ang mga responders sa lungsod o siyudad motabang usab ngadto sa silingan nilang lugar kung gikinahanglan.

Ang PDRRMO moresponde gihapon sa mga emerhensiya kung gikinahanglan ang ilang tabang.

Hinoon giklaro ni Cortes nga bisan og duna nay mga responders sa kalungsuran dili nila mapaneguro ang “zero casualty” kung dunay moigo nga katalagman apan daku ang posibilidad nga mokunhod ang gidaghanon sa casualty.

Samtang nangandam na ang Talisay City DRRMO sa dili normal nga pag-uwan karong semanaha.

Si Alvin Santillana, pangulo sa CDRRMO, nanawagan sa mga opisyal sa barangay nga ipasidaan sab daan sa ilang mga konstituwente ang bati nga panahon.

Ila nang giandam ang mga kagamitan aron paspas ang pagresponde kun adunay mga panghitabo gawas sa rubber boat nga nangliki na gumikan kay napasagdan sa niaging administrasyon.

Ang mga barangay nga kuyaw sa pagsaka sa tubig sa sapa mao ang San Isidro, Lawaan 2, Lawaan 3, Tabunok, Mohon, Campo 4, Lagtang, Biasong, Dumlog ug Jaclupan.

Samtang ang mga barangay nga daplin sa dagat mao ang Poblacion, Cansojong, Dumlog, Biasong, Pooc, Tanke ug San Roque.

Giila sab ang mga barangay sa Manipis, Campo 4, Jaclupan, Lagtang, Tapul ug Maghaway nga pulos kuyaw sa pagdahili sa yuta.

Sa laing bahin, gihingusgan sa kagamhanan sa Dakbayan sa Mandaue ang pagpanglimpiyo sa mga kanal ug mga sapa isip paagi sa pagpugong sa pagbaha ug pagkuyanap sa sakit nga dengue.

Si Mandaue City Mayor Gabriel Luis “Luigi” Quisumbing ang gikatakda nga mopasiugda og hiniusang   pagpanglimpyo sa 27 ka barangay sa dakbayan.

Kahinumduman nga hugtanong gidili na ang paggamit sa mga plastic bag sa dakbayan tungod kay kini ang nakaingon sa pagkabara sa mga kanal ug sapa. - Brenda D. Batuto, Gabriel C. Bonjoc ug Romeo T. Limpangog/GMR) (BANAT NEWS)