Talisay City Hall half-day ra

CEBU, Philippines - Nanguli ang mga kawani sa Talisay City Hall kagahapon sa hapon human nideklarar si Mayor Eduardo Gullas nga half-day lang ang trabaho.

Kini aron paghatag og higayon sa mga tawo nga makadagkot sa mga sementeryo tungod kay ang petsa 2 sa Nobiyembre mao man gyud ang adlaw sa mga minatay o sa mga kalag.

Si Jomar Rubio, executive secretary sa mayor, niklaro nga gipabilin lang ang mga opisina nga naglihok 24-oras sama sa City Disaster Risk Reduction and Management Office (DRRMO).

Samtang gipahibawo ni Supt. Emerson Dante, hepe sa kapolisan sa dakbayan, nga malinawon ug hapsay ang kasaulogan sa kalag-kalag diin ilang hugot nga gibantayan ang duha ka pangpublikong sam-ang sa Poblacion ug Cansojong. Adunay natala nga nagsinumbagay nga mga hubog apan nahusay ra sab kini nila.