Gipamusil samtang natulog

CEBU, Philippines - Dead on the spot ang maglive-in partner nga gipamusil samtang nangatulog sa Brgy. San Isidro sa lungsod sa Asturias pasado alas 6 sa nakalabayng buntag.

Ang mga biktima giila nga silang Randy Banate ug Jonna Mariz Laguna.

Sa imbestigasyon sa Asturias Police nga gipangulohan ni SPO2 Floriano Olarte nasayran nga ang duha anaa na sa ilang drug watchlist.

Basi sa pamahayag sa manghod sa usa sa mga biktima nga samtang nangatulog iyang nabantayan nga adunay misulod sa ilang balay.

Gumikan sa kahadlok mitago kini sa iyang habol ug iya na lang nadungog ang sunod-sunod nga buto sa armas.Human mibiya ang mamumuno iya nang nakita nga nagkadugo ang duha ug wala nay kinabuhi. Wala na usab niya makit-i ang nawong sa kriminal.

Parehong nakaangkon og samad pinusilan sa ilang ulo ang mga biktima.

Padayon pang mihimo og pakisusi ang kapulisan sa tinuoray nga motibo ug ang pagpangita sa mga namusil.

Sa dakbayan sa Sugbo, patay sa pagpamusil si Lowell Primacion samtang nagtan-aw og hantak sa Brgy. Quiot pasado ala-una sa nakalabay nga kadlawon.

Human sa pagpamusil dali sab nga misibat ang gunman sakay sa motorsiklo.

Sa gihimong imbestigasyon sa CCPO  Homicide Section, nalambigit sa ilegal nga drugas ang biktima sumala sa kapuyo niini.

Sa Danao City, patay ang usa ka Louie Lao sa Brgy. Poblacion human pusila sa 2 ka armadong tawo nga giingong sakop sa vigilante.  Nahitabo ang insidente pasado alas 11 sa gabii niadtong Sabado.

Ang patayng lawas sa biktima gibutangan og “Pusher ako wag ninyo akong tularan” nga gisulat sa bond paper. Matud ni PO3 Roselo Campo sa Danao City Police nga naglakaw ang biktima padung sa panimay sa iyang hinigugma dihang gisugat sa riding in tandem.

Gibutyag ni Campo nga lakip si Lao sa drug watchlist ug gipaubos sa Tukhang apan wala motahan.

Sa Cordova, patay usab ang mangayohay og sapatos sa Brgy. Day-as human pusila niadtong miaging gabii.Giila ni PO2 Ismael Limpangog sa Cordova Police ang namatay nga si Alberto Gardiano Gabito.

Naglingkod lang kini sa iyang pinuy-anan dihang niabot ang wala mailhing tawo nga namusil dayon sibat. Matud ni Limpangog nga nitug-an ang kapuyo niini nga usa  ka Erwin ang gikabangi sa namatay ug wala pa masayri ang hinungdan. (BANAT NEWS)