Protektor ni Kerwin dinhi sa Cebu ipadakop
CEBU, Philippines - Gustong masayran sa direktor sa Cebu City Police Office ang impormasyon nga ania sa Dakbayan sa Sugbo nagtago karon si Rolando “Kerwin” Espinosa ang anak sa mayor sa lungsod sa Albuera, Leyte nga una nang mitahan sa kapulisan sa Campo Crame.
Ang direktor sa Cebu City Police Office, Sr. Supt. Joel Doria mipasabot nga may kamandoan na siya sa Police Station 4 pag-monitor sa mga lugar nga dunay mga paryente sa mga Espinosa nga nagpuyo.
Sumala pa ni PNP Chief Ronald “Bato” dela Rosa aduna silay nadawat nga ‘surrender feelers’ gikan ni Kerwin.
Kini samtang giplanohan na sa kapolisan sa Rehiyon 8 ang pagpasaka og kaso batok sa amahan niini nga si Albuera Mayor Rolando Espinosa Sr. tungod sa nahitabong shootout didto sa atubangan sa balay niini nga diin unom ka giingong iyang mga sakop ang namatay ug nakuhaan og mga tag-as nga kalibre sa armas.
Gipasabot ni Doria nga alang usab kini sa seguridad sa mga paryente sa pamilyang Espinosa nga gikatahong nahadlok human migawas ang balita kabahin sa mag-amahang Espinosa.
Gisubay usab karon ni Doria ang report nga adunay polis ug politiko dinhi sa Sugbo nga protektor ni Kerwin subay sa gipagawas nga impormasyon ni Cebu City Mayor Tomas Osmeña ug posibleng nia kini dinhi sa Sugbo nagtago.
Si Osmeña mihagit sa kapulisan sa Sugbo sa pagpangita ni Kerwin dinhi ingon man ang police ug politiko nga protektor ni Kerwin ug kun ila kining mabuhat, posibleng iyang ibalik ang suporta sa han-ay sa kapulisan. (BANAT NEWS)
- Latest
