29 tinun-an nireklamo batok eskuylahan

CEBU, Philippines - Nidangop sa mga tigbalita ang 29 ka mga tinun-an sa usa ka tunghaan nga nahimutang sa  Brgy. Basak, sa Dakbayan sa Lapu-Lapu aron sa pagpanawagan ngadto sa tag-iya sa maong tunghaan nga ihatag ang ilang school credentials aron makabalhin sila sa ubang tunghaan.

Kini human nasuta sa mga tinun-an sa miagi pang tuig nga dili accredited ang tunghaan (pangalan gipugngan una sa Banat News) sa pag-operate og kolehiyo ug pag-offer og duha ka mga kursong Bachelor of Science in Aircraft Maintenance diha sa Commission on Higher Education ug giingong wala kini Business Permit pag-operate sa tertiary.

Matud sa mga reklamanteng mga tinun-an nga niadtong tuig 2014 sa dayon na nilang tapos sa high school giagni sila nga motungha sa  maong tunghaan kay barato ang tuition fee nga nagkantidad og P6,000.

Gitanyag nila ang 2-year ug 4-year sa duha ka kurso apan sa dihang mokuha na unta og certificate ang mga tinun-an alang sa 2-year course walay mahatag nga certificate ang tunghaan.

Mao kini hinungdan nga nihimo og pakisusi ang mga tinun-an diin nasuta nga matud pa walay permit ug dili accredited ang ilang gi-eskwelahan ug dili pa ma-credit sa ubang kolehiyo ang mga subjects nga ilang nakuha.

Tungod niini, buot unta nilang motungha og balik sa first year sa laing eskuylahan apan naproblema sila kay dili ibalik ang ilang high school records ug pabayron pa sila og dako.

Gisuwayan pagkuha sa Banat News og pamahayag ang giingong tag-iya nga usa ka abogado apan wala kini motubag sa mga tawag. (BANAT NEWS)