Tulo babaye, laing 2 sikop sa buy-bust
CEBU, Philippines – Kapin sa P200 mil nga kantidad sa gituohang shabu ang nasakmit sa kapolisan sa probinsya atol sa managlahi’ng pagpangronda niadto’ng nakalabay nga adlaw ug kagahapong adlawa.
Ang mga sakop sa Provincial Intelligence Branch sa Cebu Provincial Police Office nisikop sa duha ka babaye sa Sitio Sto. Niño, Barangay Flores, Catmon pasado alas 8 kagahapon sa buntag human nakapalit og gituohang shabu ang asset sa kapolisan.
Giila ang mga dinakpan nga sila si Sonia Bragat ug Nadine Sitoy nga nagpuyo sa mao’ng dapit.
Ang mga sakop sa PIB nga gipangulohan ni SPO4 Jaime Otadoy ang nihimo sa operasyon human sa pipila ka adlaw nga pagpaniid.
Gamit ang P200 nga buy-bust money nakapalit og usa ka pakete sa gituohang shabu ang asset hangtod nga sunod nga gisikop ang mga suspek.
Narekober gikan sa mga dinakpan ang 133 ka gagmay nga pakete ug usa ka daku nga putos sa gituohang shabu nga nitimbang sa 17-gramos nga kantidad og P200, 600.
Samtang sa Lungsod sa Argao nadakpan sa kapolisan ang usa ka Richard Barbadillo sa buy-bust operation sa Barangay Lamacan pasado alas 10 sa nakalabay nga buntag.
Nasakmit sa kapolisan gikan ni Barbadillo ang pinakete’ng shabu nga kantidad og P12, 272 lakip na ang P200 nga buy-bust money.
Gipaslak na sa selda sa Argao Police ang dinakpan nga gikatakda’ng pasakaan og kaso.
Sa laing bahin, nadakpan sa managlahi’ng operasyon sa kapolisan sa Dakbayan sa Mandaue ang duha ka gikatahapang pusher og shabu nga naglakip sa usa ka babaye sa Sitio Tondo, Barangay Tingub.
Si Police Officer 2 Jay-R Galabin sa Presinto 4 sa Mandaue City Police (MCPO) niingon nga ang buy-bust batok sa babaye natigayon pinaagi sa pagpangulo sa ila’ng hepe nga si Senior Inspector Hugo Rio Ipong.
Ang laing nadakpan mao si Romeo Gaviola, 48-anyos, minyo nga taga Sitio San Antonio, Barangay Looc, kinsa nasakmitan og lima ka gagmay nga pakete sa shabu. Ang buy-bust gipahigayon sa Sitio Ampalaya, Barangay Cambaro. - /GMR) (BANAT NEWS)
- Latest
