Maguwang gidunggab sa manghud

CEBU, Philippines - Nalandig sa tambalanan ang usa ka maguwang human dunggaba og pinote sa manghud sa Barangay Papan, Sibonga pasado alas 3 sa nakalabay nga hapon.

Ang biktima giila nga si Eugenio Fernandez, 50, samtang ang manghud mao si Buenaventura Fernandez, 45, ulitawo.

Matud ni Police Officer 2 Ederlino Bacusmo, chief investigator sa Sibonga Police Station, nga halos duha ka tuig na nagbungol ang magsuon gumikan sa personal nga bikil.

Nagpuyo ra sa usa ka balay ang duha ipon sa balay sa ila’ng ginikanan.

Niadto’ng nakalabay nga hapon tayming nga pareho nga nanguha og pagkaon sa ila’ng mga hayop ang duha diin sa ila’ng pag-uli nag-abot kini sa dalan ug didto nahitabo ang krimen.

Si Bacusmo niingon nga nagdala usab og sanggot niadto’ng hitaboa ang maguwang apan nakauna og dunggab ang manghud.

Dali nga gidala sa South General Hospital sa Dakbayan sa Naga ang biktima samtang boluntaryo usab nga nitahan ang manghud sa mga barangay tanod. Hinuon gahapong adlawa nibisita sa buhatan sa kapolisan ang mga igsuon ug niingon nga dili sila interesado nga mopasaka og kaso.

Plano na lang sa ila’ng ginikanan nga buwagon na lang nila ang duha aron dili na subli nga magkabikil ug malikayan nga mobawos pa ang maguwang. (BANAT NEWS)