Habal-habal driver gibanhigan patay
CEBU, Philippines - Patay ang usa ka habal-habal driver nga gibanhigan sa wala hiilhi’ng lalaki sa Bajac, Poblacion, Liloan alas 11 pasado sa niagi’ng gabii.
Si Police Officer 3 Jayson Gayo sa Liloan Police Station niila sa biktima nga si Resureccion Brion, 40-anyos, minyo nga taga Sitio Cogon sa mao’ng barangay.
Sakay ang biktima sa iya’ng habal-habal padulong pauli sa ila’ng panimalay diha’ng kalit kini’ng gipusil sa makatulo ka higayon.
Si Gayo niingon nga wala’y nakakita sa hitabo apan may nadungog nga mga buto sa armas de fuego.
Sa pakisusi nga ila’ng gihimo mao’y ila’ng nasuta nga ang biktima nakabaton og duha ka samad pinusilan sa liog nga gituohang mao’y nakaingon sa hinanali’ng kamatayon.
Sa crime scene nakaplagan sa kapolisan ang tulo ka kabhang sa kalibre .45 nga gituohang gikan sa armas sa mga mamumuno sa biktima. (BANAT NEWS)
- Latest
