Mga senior citizens nahatagan og ayuda
CEBU, Philippines – Mga 779 ka senior citizens sa lungsod sa Badian ang nakadawat og relief assistance gikan sa kagamhanan sa probinsiya niadtong buwan sa Nobiyembre.
Si Gobernador Hilario Davide, III ug Bise Gobernador Agnes Magpale maoy nangulo sa pagpanghatag sa relief goods kini may kalambigitan sa “Halad kang Lolo ug Lola” program.
Matud ni Davide nga sa pag-umol sa Provincial Senior Citizens Council, ang probinsiya mikonsidera sa pagpanghatag og cash assistance. Samtang si Magpale mipahibawo kini nga subay sa balaod ang senior citizens mandatory nga PhilHealth members.
Ang gikinahanglan lang nila isip rekisitos mao nga kinahanglan silang mokuha og identification gikan sa Office of the Senior Citizens Affairs (OSCA).
Ang nahisgutang senior citizens nga nakadawat og hinabang naggikan kini sa Barangay Bugas, Tigbao, Santicon, Sohoton, Taytay ug Basak sa nahisgutang lungsod.
Sa Barangay Bugas mikabat sa 178 ang beneficiaries, 239 sa Barangay Tigbao, Santicon ug Sohoton ug 362 gikan sa Barangay Taytay ug Basak.
Ang relief assistance gilangkuban kini sa duha ka kilong bugas, tulo ka latang sardinas ug duha ka packs nga gatas. (BANAT NEWS)
- Latest