Agawon gidunggab sa boarder nga iyang gipaningil

CEBU, Philippines – Kritikal ang kondisyon sa usa ka lalaki nga gidunggab sa iyang boarder human nga iyang gipaninglan sa bayad sa iyang abangan kagahapon sa kadlawon didto sa Barangay Quiot, dakbayan sa Sugbo.

Ang biktima mao si Ivoo Quijano, 36-anyos, minyo nga taga Sitio Ubca, nga sakop gihapon sa Barangay Quiot. Ang suspek naila lang sa angga nga “Brod.”

Matud ni SPO2 Wetzel Berry nga si Brod duha na ka buwan nga wala mobayad sa abangan niya sa balay.

Mga alas singko sa kadlawon kagahapon, matud pa nga naghantak si Quijano kuyog ang mga higala niini ug pagkataudtaod, kalit nga niabot si Brod.

Pagkakita ni Quijano kang Brod iya dayon nga gipaninglan sa iyang abangan apan imbes nga mobayad, mibunot hinuon og kutsilyo ug  gidunggab ang biktima makaduha ka higayon. Bisan og si Quijano nakaangkon na og mga samad sa dughan, nakadagan pa kini palayo og nakapara og taxi nga mihatod kaniya sa Cebu City Medical Center.

Matud ni Berry nga medyo lawom gyud ang samad nga naangkon ni Quijano.

Pag-adto sa mga polis sa kuwarto nga gipuy-an ni Brod, ilang nasuta nga miikyas na siya gikan sa balay sa biktima ug gidala na ang kadaghanan sa iyang mga sinena. – /RUB) (BANAT NEWS)