Bonus ihatag karong adlawa

CEBU, Philippines - Ihatag na ang tag P3 mil nga financial assistance sa mga senior citizens ug sa mga magtutudlo sa Dakbayan sa Sugbo.

Matud ni Cebu City Administrator, Dr. Lucelle Mercado, ipangapod-apod na ang katapusang madawat sa mga senior citizens karong Martes, Disyembre 15.

Dugang ni Mercado nga sa naandan nga kutob alas 12 sa udto ang paghatag ngadto sa kabarangayan ug mahimo pa nga makadawat ang mga senior citizens hangtud alas 3 sa hapon. Gipasabot ni Mercado nga kini tungod kay year-end na man ug kinahanglanon nga manirado sa rekord para sa tuig 2015.

Matag tuig makadawat og tag P12 mil ang 60,000 nga rehistrado nga senior citizens sa dakbayan.

Samtang karong Domingo usab madawat sa mga magtutudlo ang ilang Christmas bonus gikan sa kagamhanan sa dakbayan. Tug-an ni Mercado nga makadawat og tag P10 mil ang tanang magtutudlo sa publiko’ng tunghaan sa dakbayan.

Adunay 5,000 ka magtutudlo ubos sa Department of Education  nga mao’y makadawat sa Christmas bonus gikan sa lokal nga kagamhanan.

Ang pundo nalakip sa P201 milyones nga supplemental budget nga gipasar sa konseho ingon man ang tag P30 mil nga bonus sa mga kawani sa City Hall nga madawat karong adlawa.  (BANAT NEWS)