Preparasyon sa IEC 2016 nagpadayon

CEBU, Philippines - Nipahigayon og Contingency Planning ang Archdiocese of Cebu, nga gipanguluhan sa  Office of the Civil Defense (OCD)-7, alang sa umaabot nga kalihukan sa 51st International Eucharistic Congress (IEC) karong Enero 24 hangtud sa 31 sunod tuig.

Ang Chairman sa Eucharistic Procession Committee sa IEC Msgr. Marnell Mejia, nagkanayon nga tuyo niini aron ilang mahibaw-an ang gidak-on sa suportang mahatag kanila sa gobiyerno ilabi na sa seguridad. Lakip sa mga gituki ang mga Medical Emergencies, untoward incidents, insidente sa pagkapaso o sunog tungod sa paggamit og kandila atol sa prosisyon ug mga krimen lakip na ang hulga sa terorismo ug uban pa.

Diha sa maong tigom ang mga representante sa Philippine National Police (PNP), Bureau of Fire Protection (BFP), Armed Forces of the Philippines (AFP), Philippine Red Cross, Cebu City Risk Reduction and Management Council ug sa City Government. Idili atol sa prosisyon ang balloons ug mga pabuto aron malikayan ang disgrasya.

Ang Assistant Regional Director sa OCD-7 nga si Niel Balaba mitug-an nga ikalima  na kining contingency planning nga ilang gipahigayon aron sa pagseguro sa seguridad sa mga kalihukan sa IEC.

Si Balaba mitug-an nga ang crowd control, maoy iyang nakita nga angayang palambuon sa mga organizers ug ang seguridad sa mga delegado gikan sa ubang kanasuran,  ug kadtong ubang delegado nga papuy-on sa mga foster family. Gibanabana nga moabot og 10 mil ang moduyog sa prosisyon sa IEC.

Samtang kabahin sa pagtangtang sa mga punoan sa kahoy sa Saint John Paul II Avenue diin nahimutang IEC Pavilion nga venue sa kalihokan, gikatakdang makigkita si Mayor Michael Rama kang Msgr. Dennis Villarojo aron pasabton kini sa plano sa siyudad.

Kahinumdoman nga giklaro ni Villarojo nga wala nila hangyoa ang mayor nga ipatangtang ang maong mga kahoy sa center island kay makatabang kini sa katawhan ilabi na sa preskong hangin ug landong. Ang siyudad wala pa gihapon makatangtang niini kay hangtud karon wala sila hatagi og pagtugot sa Department of Environment and Natural Resources-7.

Si Rama   buot niya nga himuong one way traffic ang maong dan aron di na maghuot ang mga sakyanan nga laho0s sa Salinas Drive sa Barangay Lahug. (Decemay Padilla ug Rowena D. Capistrano ug Sheriza Mae Uy/EIM) (BANAT NEWS)