Gi-MMA sa maguwang patay

CEBU, Philippines - Patay ang usa ka manghod human kini giayo og kulata, gibalian og liog sa iyang magulang nga gidudahang sabog sa ilegal nga drugas diha sa Sitio Dakit, Barangay Poblacion lungsod sa Pinamungajan sa nakalabay nga buntag. Ang namatay mao si Arnoldo Ferrer, 25, samtang ang suspek mao ang iyang magulang nga si Gerald Ferrer, 36, alyas Jing-jing.

Sa inisyal nga imbestigasyon sa Pinamungajan Police nasayran nga gumikan kay sige lang og kulatahon ni Gerald ang iyang asawa gibisita kini sa iyang manghod sa iyang balay aron estoryahon ug tambagan human nga gibiyaan na kini sa iyang asawa ug anak.

Apan daw sa wala kini gikalipay sa magulang ug nasuko na hinuon kini hangtod nga iyang gibukbok ang iyang manghod.

Si Police Officer 3 Delbert Barrera nga maoy usa sa nakaresponde sa hitabo nga nahinabi sa Banat News miingon nga gawas sa grabeng bun-og sa nawong ug ulo nabalian usab sa liog si Arnoldo.

Sumala pa ni Barrera nga wala undangi og kulata sa magulang ang iyang manghod hangtud nga kini nakuyapan.

Ang ilang amahan daling misanta sa suspek ug gidala ang biktima sa Pinamungajan District Hospital apan kini gideklarar nga dead on arrival.

Matud pa ni Barrera nga napriso na kaniadto si Gerald sa Pinamungajan Police Station human gireklamo sa iyang asawa nga nangulata apan hasta ang mga kauban nga mga piniriso ni Gerald ang nangreklamo usab kay sila gipangbukbok usab.

Sumala pa ni Barrera nga gumikan sa drugas daw sa nausab na ang dagan sa panghunahuna sa suspekug magsige ra kini og “shadow fighting”  ug magsige og suon sa mga gipanghimo sa mga mixed martial artists sa telebisyon.

Kasamtangan nga gibalhog sa selda sa kapulisan ang suspetsado apan si Barrera miingon nga kung walay mopasaka og kaso kaniya hayan ila ra usab kini nga mapabuhian. - /EIM (BANAT NEWS)