2 tindera, Indian gitulis naangol

CEBU, Philippines – Naangol ang duha ka negosyante’ng babaye og isda nga nisukol sa mga tulisan hinungdan nga gipamusil alas 10 pasado sa niagi’ng gabii sa barangay Manteja, dakbayan sa Danao.

Si Police Officer 3 Nelson Pantoja sa Danao City Police Station niila sa duha ka biktima nga sila si Norma Manco, 40, minyo ug Violita Mecca, 42, pulos nagpuyo sa mao’ng dapit ug naninda sa merkado publiko sa nahisgutang dakbayan.

Padulong pauli ang duha ka biktima diha’ng gikasugat ang unom ka wala hiilhi’ng lalaki ug kalit lang sila’ng gitionan og armas ug nideklarar nga tulis. Gipangayo sa mga tulisan ang dala’ng kwarta sa mga biktima apan diha’ng nagdumili sa paghatag, sila gipamusil.

Si Manco nakabaton og samad pinusilan sa wala’ng bukton ug samad sa tiyan ang naangkon ni Mecca. Mokabat sa P25,000 ang nadala sa mga tulisan nga dali’ng nisibat pahilayo samtang ang mga biktima dali nga gidala sa Danao Provincial Hospital apan gibalhin sa Vicente Sotto Memorial Medical Center.

Samtang grabe’ng naangol ang usa ka Indian nga biktima sa pagpanulis sa taxi drayber nga iya’ng giluwanan sa Purok Gemilina, Pilapilan, barangay Yati, lungsod sa Liloan alas 5 pasado sa niagi’ng kadlawon apan nadakpan ang suspek kuyog sa iya’ng igsuon.

Si Police Officer 3 Jayson Gayo sa Liloan Police Station niila sa biktima nga si Saturudas Bally, 34, nagpuyo sa Poblacion, Liloan ug ang suspek mao si Ferdinand Armenton, 30, drayber sa Six Taxi nga nagdala sa plate number GXD 805. Nadakpan usab ang manghud sa taxi drayber nga si Francis Armenton, 29, taga Canduman Housing, dakbayan sa Mandaue.

Gikan sa dakbayan sa Mandaue ang biktima ug nagpahatud sa taxi sa Liloan apan diha’ng nahidangat sa barangay Yati, kalit lang nideklarar og tulis ang drayber. Nagdumili sa paghatag sa iya’ng salapi ang biktima hinungdan nga gipuspusan sa tubo nga puthaw ang ulo nga nakaingon sa grabe’ng pagkaangol niini.

Human nakuha sa suspek ang P10,000 sa biktima, dali nipahilayo ang suspek ug ang biktima nga bisan nakabaton og bun-og nakapangayo pa og panabang sa kapolisan.

Ang hepe sa Liloan Police Station nga si Senior Inspector Ramil Morpos ang nangulo sa follow-up operation nga niresulta sa pagkasikop sa suspek sa ila’ng panimalay kauban sa igsuon sa Canduman Housing ug temporaryo nga nagtingkagol sa sulod sa detention cell.  (BANAT NEWS)