Supplemental budget katulo na nasangit
CEBU, Philippines - Sa ikatulo’ng higayon, wala gihapon aprobahi sa konseho sa dakbayan sa Sugbo ang supplemental budget 1 human mayoriya sa mga konsehal ang nibotar sa pagsuspenso una sa budget.
Kini samtang anaa pa’y kaso nga gipasaka sa usa ka Romulo Torres nga nagkwestiyon sa paggasto sa halin sa South Road Properties nga kantidad og P2.8 bilyones nga nalakip sa supplemental budget.
Apan matud ni Konsehal Gerry Carillo nga gibasura na sa korte ang temporary restraining order nga gipangayo ni Torres ug angay lang nga aprobahan na ang budget aron dili na kini malangan.
Wala mobotar ang habig sa Bando Osmeña Pundok Kauswagan nga sila si Konsehal Eugenio Gabuya, Lea Japson, Nida Cabrera, Sisinio Andales, Roberto Cabarrubias, Mary Ann Delos Santos, Alvin Dizon, Margot Osmeña ug Alvin Arcilla.
Ang nibotar nga uyon sa budget mao sila si Carillo, Philip Zafra, Richard Osmeña, Noel Wenceslao, Hanz Abella ug James Cuenco.
Gikwestiyon usab ni Arcilla ang paghatag sa terminal leave nila’ng kanhi konsehal Joey Daluz sa kantidad nga P700,000 ug kanhi konsehal Edu Rama Jr., nga nagkantidad og kapin P800,000 kinsa mga kaalyado sa Team Rama nga magpapili sa pagka-konsehal sa south district.
Matud ni Dizon nga nangayo na sila sa guidelines sa paghatag og terminal leave benefits sa mga kanhi opisyal apan wala gihapon sila’y nadawat hangtud karon.
Si Carillo sa iya’ng bahin nisugyot nga tangtangon ang gikwestiyon nga lakip sa SB1 ug aprobahan ang ubang items aron dili malangan ilabi na ang tipping fee nga P87 milyones sa pagkolekta sa basura sa kabarangayan. (BANAT NEWS)
- Latest
