Pagkolekta sa basura doblehon

CEBU, Philippines – Gihangyo ni Cebu City acting Mayor Edgardo Labella ang kabarangayan nga doblehon ang pagkolekta sa basura ug giawhag niya ang konseho sa dakbayan nga ipasar ang supplemental budget diin nalakip ang alang sa tipping fee sa paglabay sa basura.

Matud ni Labellla nga iya’ng nasuta nga ang rason nga nagkadaghan ang basura sa barangay tungod sa wala pa pag-aprobar sa supplemental budget. Tug-an pa ni Labella nga kaniadto makakolekta og basura ang barangay duha ngadto sa tulo ka higayon apan karon kausa na lang ug ideretso na ngadto sa labayanan sa Consolacion nga layo sa taga south district.

Usa sa problema sa kagamhanan sa dakbayan ang ka wala’y transfer station diin adto ibutang ang mga nakolekta ug tingubon sa paglabay.

Gipaagi sa president sa Association of Barangay Council, Philip Zafra, ang hangyo ni Labella. Plano ni Labella nga utangon una ang bayad sa tipping fee sa kantidad nga P1,500 matag tonelada nga basura apan kun ideretso og hatud sa Consolacion, P700 lang. Samtang ang konseho niaprobar sa resolusyon ni Konsehal Nida Cabrera sa paghangyo nga ipadayon ang pag-operate sa transfer station sa gisirad-an nga Inayawan landfill.

Adunay suwat nga gipadala ang Environmental Management Bureau-7 sa buhatan ni Cabrera nga dili sila makatambong sa executive session karong hapon kalabot sa transfer station sa Inayawan landfill. Hinuon adunay sugyot ang EMB nga mahimo nga maka-operate ang kagamhanan sa dakbayan sa Inayawan landfill gawas sa disposal area.

Nanawagan usab si Cabrera sa kabarangayan nga motambong sa executive session karong adlawa. – /GMR) (BANAT NEWS)