Menor nagsuyop, pusher nasikop
CEBU, Philippines – Nasikop ang usa ka menor de edad nga nagsuyop samtang usa ka lalaki nga gituohang drug pusher nasikop usab sa buy-bust operation sa niagi’ng gabii.
Itugyan ngadto sa Municipal Social Welfare and Development Office sa lungsod sa Borbon ang 16-anyos nga lalaki human naatlan sa kapolisan nga nagsuyop og shabu pasado alas dos sa niagi’ng hapon sa barangay Laaw.
Usa ka tawag sa concerned citizen ang nadawat sa kapolisan kalabot sa nagpadayon nga pagsuyop sa grupo sa mga bata nga lalaki sa usa ka payag sa mao’ng lugar.
Diha’ng girespondehan sa mga polis, nabungkag ang grupo sa mga lalaki apan nahabilin ang menor de edad hinungdan nga siya nasikop.
Samtang usa ka lalaki nga gidudahang drug pusher ang nasikop sa buy-bust operation pasado alas 9 sa niagi’ng gabii sa isla nga barangay sa Logon, lungsod sa Daanbantayan.
Siya naila nga si Warlito Bohol, 41, molupyo sa mao’ng dapit.
Nasikop ang mao’ng lalaki human nga gibaligyaan niya og usa ka pakete nga shabu ang usa ka poseur-buyer.
Nakuhaan og 10 ka pakete sa shabu, lighter, P320 nga gidudahang halin ug ang buy-bust money ang suspek.
Natanggong ang suspek sa Daanbantayan Police Station ug pasakaan siya og kaso’ng kalapasan sa Comprehensive Dangerous Drugs Act of 2002. - /GMR) (BANAT NEWS)
- Latest
