Pekeng BFP Inspectors

CEBU, Philippines – Dili ikalimod nga ang grupo sa mga dautang tawo buhaton ang tanan aron lang makakwarta ug makabiktima, hasta ang Bureau of Fire Protection (BFP)-7 wala man makalingkawas niini human ang ilang ahensiya gigamit sa pagpangilad.

Mipagawas karon og pahimangno sa publiko ang BFP-7 nga magbantay niining grupo sa mga kalalakin-an nga magpailang sakop sa kabomberohan ug mohimo og inspeksiyon sa kabalayan apan ang modus mao ang pagpangilad. Ang maong grupo misiaw didto sa lungsod sa Minglanilla ug ang maong modus nahibaw-an dihang si Senior Fire Officer 3 Paz Cuyno, duty investigator sa Talisay City Fire Department mi-post sa iyang Facebook Account labot sa mga kalalakin-an nga matud pa sakop sa BFP.

Nahinabi sa Banat News si SFO3 Cuyno ug kini miingon nga niadtong Septiyembre 18, adlaw’ng Biyernes, pasado alas 10 sa buntag, off duty siya ug dihang miuli na kini sa iyang gipuy-an sa Decca Homes, barangay Tungkil, Minglanilla nakabantay nga adunay komosyon nga nahitabo sa gate sa subdivision.

Nagpakisusi siya dayon ug iyang nasuta nga adunay taga “BFP” ang mihimo og inspeksiyon sa mga kabalayan. Wa hinuon siya magpaila nga taga BFP ug nangutana siya hain ilang inspection order apan walay napakita kaniyang dokumento.

Ang maong lalaki nakasulod na gyud sa mga kabalayan ug matud pa nagpataka na lang sa pagsulod-gawas ug giingong duna pa silay gi-harass.

Dihang nangutana si Cuyno kun hain sila nadestino mitubag ang grupo nga taga-Quezon City didto misantop sa huna-huna niini nga mangingilad ang maong grupo.

Sumala pa niya, kun ang BFP mohimo og inspection sa kabalayan, makig-alayon gyud sila sa hingtungdan, ug namatikdan usab niini wala silay Identification Card ug wala nagsul-ob  og uniporme sa bombero nga mao gyud ang angay buhaton kun mohimo og inspection.

Nanawag sila si Cuyno og polis ug dihang miabot na ang patrol car naglumbaanay sa pagpanagan ang grupo, dunay nasikop apan gibuhian ra usab dayon human  walay reklamante.

Tungod sa maong panghitabo, gihulagway ni Fire Officer 3 Wendel Villanueva, Public Information Officer sa BFP-7 nga alarming ang maong panghitabo tungod kay gigamit ang ilang ahensiya sa binuang.

Awhag nila sa publiko kun dunay magpaila nga sakop sa bombero ug mohimo og inspeksiyon  angay gyud nilang pangayoan og ID nga duly issued sa BFP, Inspection Order pinirmahan sa City/Municipal Fire Marshal ug ikatulo ang mga inspector magsul-ob gyud og uniporme. Nasayran nga dili kini maoy una nga insidente nga gigamit ang ilang ahensiya tungod kay didto sa Lapu-Lapu nahitabo na usab kini diin dunay namaligya og mga fire fighting equipment nagpailang taga BFP. – /EIM) (BANAT NEWS)