Budget sa PHO, hospitals padugangan

CEBU, Philippines - Nangayo og mas taas nga budget ang mga district hospitals sa probinsiya sa Sugbo alang sa sunod tuig.

Lakip sa gipangayo mao ang pagdugang sa budget sa Provincial Health Office gikan sa P409 milyones karong tuiga ngadto na sa P473 milyones sunod tuig.

Gipasabot ni Provincial Budget officer Danilo Rodas nga lakip sa maong budget ang sweldo sa mga job order sa mga tambalanan sa probinsiya.

Si Rodas nibutyag nga karong tuiga ang tanang hospital sa probinsiya adunay budget nga P297 milyones ug buot nga himuong P349 milyones alang sa sunog tuig.

Sa mao’ng budget lakip na alang sa mga tambal ug uban pa nga kinahanglanon sa mga tambalanan.

Samtang giklaro sa tagdumala sa Barili District Hospital nga wala’y bayad ang paggamit sa pasyente sa ila’ng ambulansiya.

Kini human sa report nga adunay residente kinsa ang bana naligsan sa bus unya giingong gipabayad kini og P1,500 sa ilang paggamit sa ambulansiya paingon sa tambalanan sa dakbayan sa Sugbo apan wala na makaabot sa tambalanan ang biktima ug nakabsan sa kinabuhi.

Ang P1,500 giingong alang kini sa gasolina ug per diem sa drayber.

Ang asawa sa biktima giingong naglisud pa og pangita og P1,500 niadto’ng higayuna aron lang madala ang iya’ng bana sa tambalanan.

Si Dina Orbiso, administrative officer sa nahisgutang tambalanan, niklaro nga libre ang ila’ng pagpagamit sa ambulansiya apan niadto’ng higayuna ug hangtud karon ang ila’ng ambulansiya guba hinungdan nga manawag sila sa ila’ng munisipyo aron adunay magamit nga ambulansiya.

Matud ni Orbiso nga wala na sila’y kalabutan kung unsay pamaagi sa munisipyo sa pagpagamit sa ambulansiya.

Sayo niini si Gobernador Hilario Davide III nagkanayon nga sa iya’ng nasayran libre ang pagpagamit sa ambulansiya sa mga pasyente sa kalungsuran.  (BANAT NEWS)