Kaso ni Karen sirado na

CEBU, Philippines - Grabeng pagmahay ug gibasol sa mga ginikanan sa 17-anyos nga tinun-an ang amiga niini nga kapuyo sa suspek nga mipatay sa ilang anak diha sa ilang balay diha sa Corinthians Subdivision sa barangay Suba-Masulog, Lapu-Lapu City sa miaging semana.

Ang gimahayan ni Emelinda Montebon mao si Jennalyn Soon kinsa manghod sa bestfriend ni Emelinda nga atoa na sa Hawaii. Matud pa nga si Emelinda maoy padad-an og kwarta alang sa pamilya ni Jennalyn maong nasuod nila kini.

Ang suspetsadong si Ruben Fernandez upat ka tuig na nga kapuyo ni Jennalyn giingong magsulod- gawas na sa prisohan tungod sa kaso sa pagpangawat.

Ang suspetsado gihulagway ni Barangay Kapitan Cyrus Eyas sa San Vicente, sa Isla sa Olanggo nga notado kining kawatan  sa ilang barangay.

Gitug-an ni Jennalyn nga unang higayon nga nakataak si Ruben sa lugar sa mga Montebon niadtong Martes sa pagpamasin kun nipadala og kwarta ang iyang maguwang ngadto kang Emelinda.

Human sa pipila ka minutos nigawas sila ug sa pag-abot sa unahan giingong nahutdan sila og gasolina hinungdan nga gipakanaog siya ni Ruben.

Pasado ala una sa hapon na sila nagkita balik ni Ruben sa balay sa kaubang piniriso ni Ruben nga adunay dalang bag, DSLR Camera ug uban pa nga mga butang.

Matud ni Jennalyn bisan kun kahibawo siya nga kawatan ug tiggamitan og ginadiling drugas ang iyang kapuyo wala siya magdahom si Karen ang biktimahon ug patyon niya kini.

Si Ruben gipusil patay didto sa Isla sa Nasingin, sa Getafe, Bohol niadtong Martes sa buntag samtang nagpadung pa didto ang kapolisan sa Lapu-Lapu aron unta siya pangitaon.

Si Lapu-Lapu City Mayor Paz Radaza nakadayeg sa kalampusan sa kapulisan ug iyaha karon gitun-an kun si kinsa ang angay hatagan sa P500 mil nga reward money.

Kagahapon sa buntag, gipresentar sa Special Investigation Task Group ngadto sa pamilyang Montebon ug sa mga tigbalita ang mga ebidensiya lakip na ang mga saksi. Gipresentar usa ang sequence sa panghitabo nga nagtudlo kang Ruben nga maoy primary suspect sa kamatayon ni Karen Kaye.

Si Sr. Supt. Rey Lyndon Lawas, ang pangulo sa Special Investigation Task Group Montebon mikonsiderar nga sirado na ang kaso sa pagpatay kang Montebon.

Kini samtang ang kapolisan sa Getafe pinangulohan ni Insp. Marcelino Mejias mihimo na usab og imbestigasyon kun kinsay nagpatay kang Fernandez. (BANAT NEWS)