Karnaper kulatado

CEBU, Philippines – Nagtingkagol karon sa prisohan ang usa ka lalaki nga mihapak og bato sa duha ka menor nga lalaki, mi-hostage sa usa ka batang babaye human siya napakyas pag-karnap sa usa ka motor niadtong Lunes sa buntag diha sa barangay Camugao, Pinamungajan.

Ang maong lalaki naila nga si Rogelio Largo Librea, 27, taga Magdugo, Toledo City nga naputos og bun-og dihang gitabangan og kulata sa mga tawo.

Si Police Officer 1 Alberto Bibas, desk officer sa Pinamungajan Police Station nga nahinabi sa Banat News miingon nga nakadawat sila og taho gikan sa Kagawad Teopanes Muñasque kalabot sa lalaking ilang gidakop.

Sumala pa ni Bibas, si Librea gidakop human niini gisuwayan pag-karnap ang motorsiklong gisakyan sa duha ka menor de edad nga nag-edad og 14-anyos ug 16-anyos nga iyang gipanghampak og bato ang mga ulo ug mata.

Apan gidemalas kini kay sa pagpadagan niya sa motor naputol ang kadena niini hinungdan nga gibiyaan niya ang motor ug misud sa balay sa usa ka Prima Canillo 71, ug didto gi-hostage ang 8- anyos nga apo sa biyuda ug gitionan og buak nga bildo ug patyon niya kun dunay moduol.

Sa pagkahibawo ni Kapitan Mario Moñasque mi-adto siya sa balay sa biyuda kuyog ang mga barangay tanod ug nakombinsir nila kini nga buhian ang bata.

Ang bata nakaangkon og garas sa iyang tuong aping ug abaga agi sa bildo nga gition sa suspek.

Apan dihang gisakay na sa mini-dumptruck ang suspek aron dad-on sa barangay hall gikatahong milayat kini ug didto gigukod sa mga estambay ug gikuninitan og kulata.

Ang mga biktima ug ang suspek pulos gidala sa kapolisan ngadto sa Pinamungajan District Hospital. – /EIM) (BANAT NEWS)