JVR ikiha ni Diaz
CEBU, Philippines - Nibahad nga mopasaka og kaso’ng grave abuse of authority ug mandamus si Konsehal Aldin Diaz batok ni Talisay City Mayor Johnny V. de los Reyes ug sa anak nga si City Administrator John Yre.
Kini kung dili gyud mohatag og refund ug travel order ang mayor sa iya’ng nagasto sa pagtungha sa masteral course.
Matud ni Diaz nga sila’ng mga konsehal ang adunay prebilihiyo nga makakuha sa kurso subay sa programa sa Philippine Councilors League (PCL). Kini gigahinan sa siyudad og budget hinungdan nga sila si Diaz, Konsehal Jojo Bacaltos ug Dory Emit ang nipahimulos sa higayon.
Apan si Diaz lang ang naproblema sa iya’ng travel order ug refund nga mokantidad og P20,400 sulod sa buwan sa Agosto.
"Mokiha ko nila kun sa ako’ng final demand magmagahi gihapon sila paghatag sa ako’ng gipangayo kay ministerial lang raba siya kay under baya ko sa legislative department," nagkanayon si Diaz.
Matud niya nga sa una dili siya maglisud sa pagproseso apan karon lang problema na kaayo kay ingnon lang siya nga gitanggong sa opisina ni John Yre.
Nagduda si Diaz nga may kalabutan ang politika human siya nibiya na sa kampo sa mayor ug nikuyog ni Bise Mayor Romeo Villarante.
Samtang ang mayor niingon nga ipapadayun lang ni Diaz ang pagpasaka og kaso tungod kay wala sila'y mapaabot sa iya’ng gipangayo.
"Kay dili man sila maayo nako, sa sige nila og laslas sa budget mao na nga ako sab sila’ng ingon ani-on," matud ni JVR.
Sa iya’ng bahin si Villarante nagkanayon nga ang Department of Budget and Management nagmando nga iya ang gahum sa pag-aprobar sa travel and trainings ug ministerial lang sa mayor.
"Ang gibuhat sa mayor nagpakita lang nga highly illegal or irregular to withhold the travel order of Councilor Diaz," matud ni Villarante. (BANAT NEWS)
- Latest
