Highway Patrol giisyohan na’g TOP sa LTO

CEBU, Philippines - Gitataw ni LTO-7 regional director Arnel Tancinco nga ang mga sakop sa PNP Highway Patrol Group (HPG)-7 giisyohan na nila og Temporary Operators Permit (TOP) ug sila makadakop na og mga malapason sa balaod sa pagmaneho’g sakyanan.

Matud ni Tancinco nga sugod kaniadtong Mayo gibalikan na nila pag-isyu og TOP ang mga sakop sa HPG-7 aron manakop sa mga malapason sa Republic Act 4136, kon Transportation and Traffic Code.

Si Tancinco miingon nga ang LTO aduna la’y 12 ka law enforcers samtang ang HPG adunay 80 ka sakop mao nga gitan-aw nila nga makatabang kini kanila pagpatuman sa balaod.

Gibutyag ni Tancinco nga tulo ka “E” ang tubag sa problema sa trapiko ug kini gilangkoban sa Education, Engineering ug Enforcement.

Sa education, kinahanglan nga mahibawo ang publiko sa balaod sa trapiko ug dili lang mag-agad sa mga ahensiya nga tigpatuman sa balaod.

Naglaum si Tancinco nga magtambayayong na unta ang mga ahensiya sa kagamhanan alang sa pagsulbad sa trapiko sa tibuok Metro Cebu. (BANAT NEWS)