Lima ka Japanese investors interesado sa PPP sa Cebu

CEBU, Philippines – Lima ka mga investors sa Japan ang nagpakita og interes nga moanhi sa Sugbo ug mosusi kung asa’ng dapita sila makabubo og puhonan pinaagi sa Public-Private Partnership (PPP) program sa probinsiya.

Si BJ Yap sa Provincial Promotion Center gimandoan ni Gobernador Hilario Davide III nga kontakon ang maong mga investors aron maimbitar sila sa probinsya sa labing daling panahon.

Lakip sa mga proyekto nga buot sa probinsiya nga mapaubos sa PPP mao ang kaugmaran sa Cebu South Bus Terminal (CSBT), pagpauswag sa mga tambalanan ug mga ekipo niini ug pagtukod sa center for disaster research.

Niining ulahi lang, si Davide mibiyahe ngadto sa Japan aron mangagni og mga investors didto alang sa PPP program sa mga proyekto sa probinsiya.

Si Davide sa iyang speech atol sa 10th International Forum on Public-Private Partnership didto sa Tokyo mibida sa Sugbo nga ang ekonomiya niini mauswagon ug adunay daghang skilled workers nga makatabang og dako sa mga buot magnegosyo dinhi.

Ang Provincial Information Officer, Ethel Natera mipasabot nga sa PPP usa ka sistema sa partnership diin ang usa ka investor mamuhonan og negosyo nga iyaha sa probinsiya diin sila maoy modumala niini apan mohatag sila og bahin sa abot sa negosyo ngadto sa probinsiya.

Si Natera miklaro nga kabahin sa mga tambalanan sa probinsiya ang probinsiya mao ang modumala niini apan nangita sila og mga investor nga modonar og mga ekipo.

Kung adunay investor nga magtukod og negosyo nganhi sa Sugbo madugangan ang abot sa gobiyerno tungod kay mobayad man sila og buhis ug daghan usab ang  makatrabaho.

Sa laing bahin, si Davide mibutyag nga niining ulahi lang ang probinsiya ug Saitama, Japan pinaagi sa University of San Jose Recoletos dunay programa nga mao ang pagpadala og mga nurses ngadto sa Japan isip mga care givers. – /EIM) (BANAT NEWS)