Robbery group nia sa Sugbo

CEBU, Philippines - Duna karo’y gipanid-ang robbery gang ang kapolisan dinhi sa Sugbo nga  posibleng mangigo og dagkong establisamento o financial institutions.

Kini sab human nga gitulis ang usa ka binggohan sa dakbayan sa Mandanue pipila ka adlaw na ang nakalabay.

Matud pa ni Superintendent Romeo Santander nga niadtong nakalabay nga adlaw gipatawag ang tanan  nga hepe sa mga intelligence units dinhi sa Sugbo ngadto na sa Regional Intelligence Division-7 aron hisgutan ang maong impormasyon.

Ang RID-7 na ‘sab ang mihatag og impormasyon sa kapulisan dinhi sa Sugbo may labot na sa maong robbery group apan kini nakaigo g’yud sa Mandaue.

Nakig-alayon na ‘sab karon ang taga City Intelligence Branch sa Cebu City Police Office  ngadto na sa kapulisan sa Mandaue aron makakuha og “profile” ang kapulisan sa mga suspek sa tulis sa binggohan.

Kagahapon sa hapon duna’y gihimo nga command conference ang kapulisan sa dakbayan sa Sugbo diin lakip sa gihisgutan ang kabahin sa pagpatuman sa kompletong seguridad aron pagpakgang sa mga badlongon nga grupo.

Kahinumdoman nga mokabat sa P1.9 milyon ang nakuha sa mga tulisan nga mitulis sa  E-Bingo sa dakbayan sa Mandaue, pipila ka adlaw na ang nakalabay. (BANAT NEWS)