Ex-police gipatay

CEBU, Philippines - Patay ang usa ka kanhi polis nga sakay sa iyang motorsiklo human kini gipusil sa gunman nga nakaangkas sab sa lain nga motorsiklo diha sa Tres de Abril, Barangay Labangon ning dakbayan sa Sugbo kagahapon sa buntag.

Ang biktima naila nga si kanhi Police Officer 3 Roy Nudalo Tolentino, 41, taga Sitio Panaghiusa, V. Rama Avenue, Cebu City.

Naigo sa ubos sa liog ug dughan si Tolentino hinungdan nga kini nakabsan sa iyang kinabuhi.

Napagan sa insidente ang usa ka Jone Homeres, 22, taga Biliran, Leyte nga nag-apprentice sa usa ka architectural firm sa barangay Inayawan samtang kini nagpalit og ballpen, naigo siya sa dughan ug gidala na sa tambalanan.

Matud pa ni SPO2 Rommel Bancog, imbestigador sa Homicide Section sa Cebu City Police Office nga nahinabi sa Banat News personal nga motibo ang anggulo nga ilang gisubay sa kamatayon ni Tolentino.

Nagsakay sa iyang motor ang biktima dihang kalit kining gituparan og usa ka motorsiklo nga gisakyan sa duha ka lalaki nga pulos nag-helmet ug ang angkas nipusil  kaniya.

“Dili to bagito nga killer, professional kaayo kay kung uban pa ‘to kilid ang igo sa biktima, pero kadto fatal shot man g’yud,” matud pa ni Bancog.

Dunay nakuha nga video sa close circuit television (CCTV) ang kapulisan apan layo ra sa crime scene.

Si Tolentino nadestino kaniadto sa Mandaue  ug nabalhin sa Mobile Patrol Group sa Cebu City kaniadtong Nobiyembre 15, 2012, apan paglabay sa unom ka buwan mi-AWOL o absent without leave kini ug natangtang sa serbisyo niadtong Abril 14, 2014. (Jojo C. Ugdol/EIM)

Paghikog sa duha ka bata susihon

Si DepEd-7 Regional Director Juliet Jeruta miklaro nga dili angay gamiton sa mga magtutudlo ang clearance aron makompleto sa mga bata ang ilang mga rekisitos una sila papasaron.

Kini maoy iyang reaksyon kabahin sa paghikog sa duha ka 15-anyos nga manag-agaw nga tinun-an sa Daanbantayan National High School tungod kay wala pirmahe ilang clearances. Matud pa ni Jeruta, polisiya sa DepEd nga panalipdan ang mga bata gikan sa pag-abuso.

Ang Provincial Council for the Welfare of Children (PCWC) mosusi usab sa maong hitabo aron pagsusi kun kinsa ang angay manubag sa nahitabo. Ang manag-agaw nagsunod og hikog niadtong Lunes ug Martes, apan dili lang kadto ang unang higayon nga dunay tinun-an nga naghikog sa maong lungsod. Niadtong miaging semana usa ka tinun-an sa Grade 7 usab ang naghikog.

Matud sa PCWC, importante nga makab-ot ang hustisya sa nabiyaang pamilya sa mga bata ilabi na kung naabusaran sila.

Sigon pa sa Gender and Development (GAD) officer Heda Largo, moimbestigar sila sa maong hitabo kun modangop kanila ang pamilya sa mga namatay nga mga tinun-an.

Samtang si Division School Superintendent Arden Monisit miingon nga ila pang gipaabot ang report gikan sa tunghaan. (Decemay P. Padilla/EIM)

Nasunogan gipaubos sa state of calamity

Gipaubos sa Cebu City ug Mandaue City ang duha ka mga barangay niini sa state of calamity gumikan sa duha ka dagkong sunog nga nakaapektar sa gatosan ka mga pamilya niadtong nakalabay nga adlaw.

Ang Cebu City Council nideklarar sa Barangay Basak-Pardo  ubos sa ‘state of calamity’diin 204 ka balay ang nasunog sa tulo ka sitio, ang Ulap, Bamboo ug Laguna.

Apil  usab sa deklarasyon ang Sitio Kawayan sa Barangay Poblacion-Pardo  human nasunogan usab og 83 ka balay niadtong Pebrero.

Mokabat og P16.4 milyones ang kinatibuk-ang danyos sa maong mga sunog.

 Matud ni Department of Social Welfare Services chief Dr. Ester Concha, base sa registration nga ilang gihimo niadtong Martes sa alas-8 sa gabii, 204 ka balay ang nasunog nga gipuy-an  sa 304 ka pamilya.

Apan si Cebu City Fire Marshal Rogelio Bongabong miingon nga 90 ka balay ang naugdaw ug 20 ang nakan-an sa kalayo.

Sa laing bahin, gipaubos usab sa state of calamity ang Zone Batong ug Zone Talong sa Barangay Paknaan, Dakbayan sa Mandaue nga naigo sa sunog niadtong miaging Martes sa hapon diin 60 ka pamilya ang nawad-an og panimalay. Mae Miasco ug Romeo T. Limpangog/EIM (FREEMAN)