Gipatay sa uyab sa anak

CEBU, Philippines – Patay ang usa ka padre de pamilya human gidunggab katorse ka higayon sa liog ug dughan sa uyab sa iyang anak nga wala niini mauyoni diha sa sulod sa ilang panimalay sa U. Aviola St., Sitio Villagonzalo II, Barangay Tejero ning dakbayan sa Sugbo kagahapon sa kaadlawon.

Ang biktima naila nga si Juanito Rosaupan, 43, usa ka karpentero samtang ang suspetsado naila nga si Cyril Josol,  usa ka pintor sa usa ka simbahan (di katoliko) sa lungsod sa Daanbantayan.

Matud pa ni Police Officer 1 Reoful Adalim sa Homicide Section sa Cebu City Police Office nga nahinabi sa Banat News nga atol sa ilang pagresponde sa crime scene nagpasad ang dugo sa salog ug bongbong sa panimalay ni Rosaupan.

Sa imbestigasyon sa kapulisan, nasuko ang biktima sa suspek tungod kay kalit lang nga misulod sa ilaha nga wala man gani pangatahoran.

Si Adalim miingon nga natugaw gikan sa pagkatulog ang biktima ug maoy iyang nakita ang suspek nga nakig-estorya sa iyang anak nga babaye hinungdan nga iyang gibadlong, apan nahitabo na hinuon ang ilang sinukmagay.

Tungatunga sa kaguliyang nag-inilogay ang duha sa kutsilyo nga gikan sa kusina nga nakuha sa suspetsado ug gidunggab niya sa biktima makadaghan nga higayon.

Gitug-an pa ni Adalim nga atol sa ilang pagsusi sa lawas sa biktima nagtaop pa ang kutsilyo sa dughan niini.

Human sa krimen, daling miikyas ang suspek ug gitabang apil ang anak sa biktima.

Walay laing anggulo nga nakita ang kapulisan sa maong krimen gawas lang sa matud pa nila dili maayong pamatasan sa suspek.

“Kadto ra g’yud nga hitaboa ang bikil ato nila, okey na man gani daw ang ginikanan sa babaye nga magminyo sila, miabot na man hinuon ato nga hitabo,” dugang pa ni Adalim. – /EIM) (BANAT NEWS)