Mga church leaders di angay mamolitika— Palma
CEBU, Philippines - Wala direkta nga gitubag ni Cebu Archbishop Jose Palma ang pangutana sa mga tigbalita kun nabahin ang baruganan sa simbahan labot sa isyu sa panawagan nga angay na mokanaog si Presidente Benigno Aquino III sa iyang katungdanan. Kini human migawas ang report diin gipanalipdan ni Manila Archbishop Luis Antonio Cardinal Tagle si Aquino gikan sa pipila ka mga kritikong arsobispo. Si Lipa Archbishop Ramon Arguelles usa sa mga sakop sa National Transformation Council usa sa nanawagan sa pagpakanaog sa presidente tungod sa Mamasapano encounter.
Matud pa ni Palma, wala niya madungog ang labot sa pagpanalipod ni Cardinal Tagle kang Aquino apan nagtuo nga ang matag lider sa simbahan adunay kaugalingong baruganan.
Nagdumili usab siya pagluwat og baruganan labot sa maong isyu kay matud niya, silang naa sa simbahan, dili angay manginlabot sa politika.
Kahinumdoman nga nasagmuyo si Cebu Archbishop Emeritus Ricardo Cardinal Vidal human nga migawas na man hinuon nga siya nanawagan pagpakanaog sa pwesto kang Aquino, nga unta gipabasa ra man siya sa baruganan sa National Transformation Council. (Decemay P. Padilla/EIM)(BANAT NEWS)
- Latest
