Positibo sa paraffin test

CEBU, Philippines – Nagpositibo sa paraffin test ang duha sa tulo ka mga suspetsado nga gitudlong maoy namusil sa tulo ka mga langyaw diin usa ang patay didto sa barangay Tabunok dakbayan sa Talisay niadtong nakalabay nga adlaw.

Kini ang gitug-an ni Superintendent Rex Derilo, hepe sa Regional Special Operations Group-7 nga nahinabi sa mga tigbalita.

Ang duha naila nga sila si Allano Velos, 40, ug Ricci Ramirez, 21, nga pulos nagpuyo sa dakbayan sa Talisay.

Apan bisan og wala nagpositibo sa paraffin test ang ikatulo nga suspek nga si Roger Cal, 40, matud pa sa mga polis wala kini nagpasabot nga wala siya’y labot sa maong krimen.

Sa buhatan sa Regional Intelligence Division nagkita ang mga suspetsado ug ang uyab sa namatay nga German national kinsa nakakita sa pagpusil patay sa biktima.

Si Sheila Mae Gimutao, 24, uyab ni Henry Haffner positibo nga miila ni Dexci Gomonte, alyas Tata, nga pabilin pang nagtago karong panahona nga maoy mipusil kang Haffner,  ug kini nakuhaan og footage sa close circuit television (CCTV) sa fastfood chain diin nahitabo ang krimen.

Mas milig-on ang ebidensya tungod kay  nag-match ang ballistics examination sa mga bala ug basiyo sa gigamit nga caliber .40 nga pistola sa nakuha sa crime scene ug sa armas nga nakuha gikan ni Velos.

Pipila ka bulan ang nakalabay nasikop na sa taga Criminal Investigation and Detection Group-7 si Gomonte gumikan sa kaso sa paghupot og ilegal nga armas.

Kagahapon, gipasaka  na ang kasong murder ug frustrated murder sa mga suspetsado  diha sa Talisay City Prosecutor’s Office.

Gawas pa niini, gipasakaan usab si Ramirez og kasong illegal possession of firearms ug illegal possession of dangerous drugs human makuhai og shabu ug armas atol sa pagdakop kaniya niadtong Pebrero 21, 2015.

Ang naangol sa maong insidente mao ang French national nga si Julien Jerome Mathieu Maillard, ug Cheten Saparaiya, usa ka Indian national.

Ang tulo ka akusado wa moduso og counter-affidavit aron kontrahon ang mga pasangil batok kanila atol sa pagbasa sa kaso diha sa buhatan ni state prosecutor Hyacinth Jadraque, matud nila ilaha kining atubangon sa korte. Samtang gi-served sa Talisay City Police ang warrant of arrest kagahapon batok sa usa sa mga naangol nga si Maillard sa kasong violence against women and their children nga gi-isyu ni Judge Alejandro Bahonsua, Jr., sa Regional Trial Court Branch 46 sa Larena, Siquijor.

Si Bahonsua mirekomendar og P24,000 nga piyansa alang sa temporary niyang kagawasan. Apan gihimakak ni Maillard ang maong pasangil. Matud niya nga duna siya’y asawa nga taga Siquijor apan buwag na sila upat na ka tuig ang milabay. Nahibulong usab siya kun nganong wala siya kadawat og complaint aron sa pagtubag sa maong pasangil.

Tungod kay pakyas si Maillard sa pagpiyansa gipaslak siya sa karsel sa Talisay City Police Station.

Samtang gipahibalo ni Talisay City Chief Police Superintendent Reycel Carmelo Dayon nga naglisod sila pagkombinser sa mga witnesses gumikan sa kahadlok ug maapektohan usab ang ilang panginabuhian.

Si Talisay City Mayor Johnny Delos Reyes misaad nga mohatag og P10 mil ug trabaho sa city hall isip pahalipay sa mga impormante nga nakatabang pagsulbad sa kaso. – /EIM) (BANAT NEWS)