Suspek sa Tabunok shooting nasikop
CEBU, Philippines - Nasikop niadtong Biyernes sa gabii sa San Isidro, Talisay City ang usa ka lalaki nga gitudlo sa di momenos tulo ka saksi nga usa kini sa mga mipusil sa tulo ka langyaw nga niresulta sa kamatayon sa German national sa miaging buntag. Ang nasikop naila nga si Allano Velos, 40, taga San Isidro, Talisay City.
Si Superintendent Reycel Carmelo Dayon, hepe sa Talisay, miingon nga sa gihimo nila nga imbestigasyon, duha ka saksi ang positibong mitudlo sa suspek nga didto sa crime scene ug nagbitbit sa iyang armas.
Sumala ni Dayon nga ang duha ka saksi padulong unta mokaon sa maong kan-anan apan nakakita sila sa suspek nga nagbarog duol sa pultahan sa fast food chain nga nagkupot og armas.
Matud ni Dayon, ang mismong uyab sa napatay nga si Henry Haffner, 31, positibo usab nga mitumbok kaniya.
Matud pa ni Dayon nga naa ra sa gawas ang suspek ug daw naghuwat kini sa iyang mga kauban ug unya na kini nagtaptap sa iyang nawong sa pagsud niya sa maong kan-anan.
Apan ang suspek hugtanon nga mihimakak sa pasangil ug miingon: “makonsensya unta ang namasangil” kaniya sanglit pito ka buok ang iyang anak ang kamagulangan 17-anyos samtang ang kamanghoran 2- anyos pa lamang.
Matud pa niya nga tumo-tumo ra kini kaniya ug mireklamo nganong nakuhaan siya og armas. Sumala pa niya nahinanok siya sa pagkatulog kuyog sa iyang asawa ug mga anak atol sa hitabo.
Samtang dunay usa ka lalaki nga gidakop ang Regional Special Operations Group (RSOG)-7 nga gisusi karon kun may kalambigitan usab sa pagpamusil sa maong mga langyaw. (BANAT NEWS)
- Latest
