Tulo napusilan sa Toledo City

CEBU, Philippines - Tulo ka tawo ang nasamdan sa nahitabong pagpamusil ug usa niini ang 11- anyos nga batang babaye nga napagan lang diha sa Barangay Bato Toledo kagahapon sa hapon.

Giila ang gipusil nga si Bristol Kyamco,  taga lungsod sa Pinamungajan nga maoy unang gipusil sa wala ilhing suspetsado nga sakay sa   motorsiklo.

Si Kyamco kauban ang usa ka Tanji Taping sakay sa usa ka motor paingon sa lungsod sa Pinamungajan.

Apan pag-abot sa barangay Bato kalit nga nibutho ang usa ka motorsiklo nga gisakyan sa duha ka lalaki ug ang angkas niini  mipusil sa duha sa makadaghang higayon.

Dali nga nakadagan si Taping samtang nahabilin si Kyamco hangtud nga naagian kini sa usa ka Paulo Villaber Bebedor nga mitabang kaniya nga madala kini sa Toledo City Hospital.

Apan pag-abot sa barangay Cabitoonan nag-atang na usab ang mga gunmen ug giusban sa pagpusil si Kyamco ug naamong hinuon si Bebedor.

Si Kyamco naigo sa tangkugo, bukton ug sa tuo nga dunggan samtang si Bebedor  nasamdan sa likod.

Samtang usa ka 11- anyos nga padung pa sa eskuylahan ang napagan ug naigo sa tuo nga paa. Ang mga biktima daling gidala sa Toledo City hospital ug gibalhin sa tambalanan sa dakbayan sa Sugbo.

Padayon nga giimbestigahan sa kapulisan ang maong panghitabo sa pagsuta sa motibo sa mga suspek.(Raymond Abarcas/EIM)(BANAT NEWS)