Kauban sa apartment nangawat

CEBU, Philippines – Gipangita karon sa kapolisan ang tulo ka batan-ong lalaki nga suspek sa lungkab sa apartment sa dalan M.C. Briones, Subangdaku, dakbayan sa Mandaue ug mikawat sa mahalon nga mga butang.

Si Police Officer 3 Arthur Cuyos sa Presinto 2 sa Mandaue City Police Office (MCPO) niingon nga ang biktima nga si Nathaniel Boncales, 23, nipasangil sa tulo niya ka kauban og puyo sa apartment nga maoy nangawat.

Giila sa biktima ang tulo nga sila si Jerome Manteca, 20, taga barangay Casuntingan; Ranilo Lawis, 20 ug ang usa nga naila lang sa ngalan nga James.

Matud pa ni Cuyos nga nakasulod sa lawak sa apartment sa biktima ang tulo ka suspek pinaagi sa pagguba sa bongbong nga plywood. Naglakip sa mga butang nga nahanaw ang usa ka laptop nga P30,000 ang kantidad, usa ka digital camera nga P11,000, cellphone ug usa ka bag nga puno sa mga sapot.

Dugang ni Cuyos nga nahingangha na lang ang biktima sa pagpauli niya gikan sa trabaho nga naguba na ang bongbong sa lawak nga iyang gipuy-an ug nahanaw na ang mga butang.

Ang tulo gituohang nagdali sa pagbiya sa lugar nga nagdala sa maong mga butang sa biktima. – /GMR) (BANAT NEWS)