Usa mieskapo sa presinto biktima sa bagyo—polis

CEBU, Philippines – Hangtud karon wala pa gihapon nakita sa kapulisan sa Malabuyoc ang duha ka minor de edad nga adunay kaso sa pagpanglungkab nga nakaeskapo sa buhatan sa kapulisan niadtong nakalabay nga kaadlawon.

Matud pa ni Police Officer 2 Ronnel Allera ang desk officer sa Malabuyoc Police nga nahinabi sa Banat News  nga hangtud sa pagkutlo niining balita wala pa nila nakaplagan ang duha ka mga bata nga nag-edad 17 ug 15     anyos.

Sumala pa ni Allera nga ila na nga gisubay ang mga paryente ug pamilya sa mga batan-on apan wala kini nakita.

Gipasabot ni Allera nga ang 15-anyos sulod-gawas na sa ilang buhatan gumikan sa kaso sa pagpangawat ug sagad sa panguhaon mga pagkaon.

Gitug-an pa ni Allera nga ang inahan sa maong 15-anyos namatay sa katalagman sa miaging tuig ug lima sila ka managsuon.

Wala na sa ilang lugar ang ilang amahan kay atoa na sa Palawan aron manginabuhi.

Nasikop ang duha ka mga  minor de edad niadtong Pebrero 2 ning tuiga human nanglungkab og tindahan nanguha og usa ka pack nga kape, usa ka pack nga biscuit ug cash P2,000.

Nabantayan ni Allera nga sagad sa mga reklamo batok sa maong 15-anyos pangawat og pagkaon.

“Sagad ireklamo nang bataa diri mga pagkaon iyang panguhaon, murag agi siguro sa gutom,” sumala pa ni Allera.

Ang maong bata matud pa ni Allera mag-estambayan kaniadto diha sa ilang presinto ug sugo-sugoon ug pakan-on usab sa mga polis.

Kini maoy hinungdan nga dihang gipakostudiya kanila sa korte ang duha,  misalig nga dili sila moeskapo.

“Dili man g’yud na mapriso sila kay mga bata man, nangatulog ra to sila unang tan-aw namo, mga alas-3 sa kaadlawon nawala na,” pasabot pa ni Allera.

Una na ‘sab nga mipasalig ang mga paryente, pamilya sa mga bata nga sila ang mangunay sa pag-turnover niini sa kapulisan kung ilang makit-an. – /EIM) (BANAT NEWS)