Mga armado ‘sikop

CEBU, Philippines - Lima ka mga lalaki nga naglakip sa usa ka polis nga nadestino sa lungsod sa San Fernando ang gisikop sa mga sakop sa Criminal Investigation and Detection Group-7 ug mga sakop sa Special Weapons and Tactics (SWAT) sa Cebu City Police Office didto sa Pier 1 sa dakbayan sa Sugbo human gi-alarma sa usa sa mga trabahante sa Cokaliong Shipping Lines nga dunay mga armado.

Ang mga nangasikop naila nga sila si Police Officer 2 Romeo Bolaño, 45, taga Lawaan, dakbayan sa Talisay, nga nakuhaan og usa ka 9mm pistol nga gikatahong iyahang service firearm; Raniel Comandante, 33, taga Basak-Mambaling Cebu City nga nakuhaa’g duha ka .22 caliber rifles ug ang tulo ka kauban nilang pulos taga Gimenez, Misamis Occidental nga sila si Joseph Lagura, 40, nakuhaan og .8mm revolver;  Benhur Gamutan, 45, nakuhaan og .40 caliber pistol;, ug si Dxci  Gomonet, 28 nga nakuhaan og .9mm pistol. Ang tanang mga armas pulos dunay mga bala.

Matud pa ni Superintendent Fermin Armendarez III, ang deputy chief sa CIDG-7 nga nahinabi sa Banat News, nakadawat sila og tawag gikan sa usa ka trabahante sa maong shipping lines may labot na sa mga armadong lalaki nga sakay sa usa ka itom nga Estrada pick-up.

Sumala pa ni Armendarez nga gikan sa Dumaguete ang maong barko nga MV Pilipinas- Dapitan ug sakay niini ang maong sakyanan ug naa sa sulod ang lima ka mga lalaki.

Gusto unta sa trabante sa maong barko nga pasak-on sa taas sa barko ang mga sakay sa pick-up apan matud pa nagmagahi hangtod nahitabo ang panaglalis.

Atol sa panaglalis gihadlok pa sa polis ang tripulante nga duna pa kini lain nga armas sa sulod sa sakyanan, hinungdan nga mitug-an kini sa kapitan sa barko ug ang kapitan na ‘sab ang mitawag og  tabang sa mga polis pag-abot nila sa pantalan.

Sa pag-abot ni Armendarez sa lugar wala nanggawas sa sakyanan ang mga lalaki hinungdan nga kini nagpatawag og mga sakop sa SWAT ug anha na  migawas ang lima ka armado.

Sa dihang gipangayo-an sa kapulisan og mga papeles ang mga lalaki wala  sila nakapakita niini, bisan si PO2 Bolaño miingon nga nabilin sa ilang opisina ang papeles sa iyang armas. Si PO2 Bolaño mirason usab nga igo lang  kini ni-hitch ride  sa maong sakyanan gikan sa Dumaguete aron makamenus sa gastos.

Ang abogado sa lima ka mga dinakpan nga si Atty. Louie Arma nga nahinabi sa mga tigbalita miingon nga magpaabot pa sila sa affidavit sa CIDG-7 una pa sila makahatag og tubag. Ang alegasyon sa upat ka kauban sa polis nga gamiton unta nila ang maong mga armas sa pagbantay sa usa ka manokan sa Mindanao. (BANAT NEWS)