Bombero naghikog patay

CEBU, Philippines - Selos ug ang gihambin nga balati-an ang hinungdan sa paghikog sa duha ka tawo sa nakalabay nga adlaw.

Usa ka sakop sa Bureau of Fire Protection (BFP) sa dakbayan sa Bogo ang nagpusil sa iyang ulo gumikan sa dili na maantus nga balatian sa barangay Cogon sa maong siyudad.

Ang nagpakamatay naila nga si FO3 George Bercero, 54, minyo ug nagpuyo sa maong lugar.

Matud ni PO2 Leonides Pedrano Jr., imbestigador sa Bogo City Police, nga tuig na nga dunay kanser sa tutunlan si Bercero ug maglisud na kini sa pagkaon.

Pasado alas 6 sa hapon niadtong nakalabay nga adlaw, usa sa iyang mga anak ang unang nakadiskubre sa ilang amahan nga nagkadugo na sulod sa iyang lawak ug duna’y igo sa pinusilan sa iyang ulo.

Off-duty si Bercero niadtong hitaboa ug wala sa balay ang iyang asawa kay naninda sa gawas.

“Gawas nga sirado ang ilang kuwarto sir, nagtuo ra pud ang mga anak niya nga basin pabuto ra to’ng nibuto,” sigun pa ni Pedrano.

Nakuha sa crime scene ang .357 revolver nga dunay usa ka basiyo ug lima ka buhing bala.

Samtang patay ang 33-anyos nga lalaki human naghikog gamit ang kable sa telepono sulod sa ilang panimalay sa sitio Saudin, Guadalupe, dakbayan sa Sugbo.

Ang nagkapamatay naila nga si Artimus Bacalla, may kapuyo sa maong lugar. Matud ni SPO2 Rommel Bancog, imbestigador sa homicide section sa Cebu City Police Office, nga selos ang hinungdan sa pagpakamatay base sa mga ebidensiya sa mga text messages sa cellphone sa inahan nga gigamit ni Bacalla.

Dunay mensahe  nga nangutana si Bacalla kung gihigugma pa ba sa iyang kapuyo ug nagbahad nga maghikog.

Pasado alas 4 sa hapon dihang nakabisita ang inahan ni Bacalla sa ilang balay, nadiskubrehan nga naghikog na kini.

Giingo’ng dili maayo ang pagtagdanay ni Bacalla ug sa iyang kapuyo ug ang inahan niini nga si Myrna mitug-an nga tiggamitan og drugas ang anak. (Jojo C. Ugdol/GMR)(BANAT NEWS)