Pantalan ug bus terminal sa Toledo gibantayan

CEBU, Philippines - Giestrikto na karon ang pagpatuman sa seguridad sa pantalan ug sa bus terminal didto sa dakbayan sa Toledo aron nga masiguro ang kaluwasan sa katawhan.

Kini tungod sa pag-abot sa daghang mga pasahero nga mamauli sa tagsa-tagsa ka probinsya aron adto mosaulog sa Pasko ug Bag-ong Tuig.

Matud ni Toledo City police chief Ricky Delilis nga ila na nga gidoble ang paghatag og police visibility sa port area ug sa terminal.

Nasayran nga adunay upat ka pulis ang gidistino aron mo-duty sa Toledo City Port Terminal ug laing duha sa Toledo City Public Bus terminal sa duha ka shifting.

 Gawas sa terminal ug port area gipahugtan usab ang seguridad sa mga mall sa dakbayan sa Toledo ug uban pa nga mga balay-patigayon sama sa mga financial establishment sa siyudad.

Lakip usab sa gipabantayan og polis mao ang Toledo City public plaza diin daghang mga tawo ang moduaw tungod sa gibutang nga mga dayan-dayan.

Samtang, gidili na usab ang pagpamaligya og mga pabuto sa merkado sa Toledo agi og paagi nga malikayan ang aksidente.

Matud ni Market Administrator Wilfredo Estefa nga dili nila tugotan ang mga negosyante sa pagpamaligya og pabuto duol sa merkado publiko sa barangay Poblacion, Toledo aron paglikay sa peligro sa mga mamalitay.

Hinuon pagka karon wala pa’y namatikdan nga namaligya og mga pabuto sa merkado.

Matud ni Estefa nga ila g’yud nga sakmiton ang mga mamaligya og pabuto ug ilang silotan kun masakpan nga dili motuman sa pagdili.

Sa miagi’ng tuig ang pagpamaligya og pabuto gitugot sa dapit duol sa menteryo sa dakbayan nga nahimutang sa Barangay Ibo.   

Si Estefa miingon nga gipanid-an usab nila ang mga presyo sa palaliton sama sa mga pang-Noche Buena ug sa Bag-ong Tuig. (BANAT NEWS)