Kanhi LTO-7 director gidakop sa CIDG-7
CEBU, Philippines – Gidakop sa Criminal Investigation and Detection Group (CIDG-7) ang kanhi regional director sa Land Transportation Office (LTO)-7 gumikan sa kasong graft.
Si Atty. Alex Leyson kinsa usa na ka barangay kagawad sa Talamban ning dakbayan sa Sugbo giaresto diha sa iyang panimalay ug nakapiyansa usab dayon og P180,000 alang sa iyang temporaryo nga kagawasan.
Gidakop siya pinasikad sa warrant of arrest nga giisyu ni Regional Trial Court Judge Sylvia Aguirre-Paderanga sa paglapas sa R.A 3019 o Anti-Graft and Corrupt Practices Act.
Niadtong nakalabay nga bulan si Joel Maloloy-on ang Human Resource Management Officer sa LTO-7 gidakop usab tungod gihapon sa maong kaso ug temporaryo usab nga nakagawas sa prisohan human nakapiyansa.
Gawas ni Leyson ug Maloloy-on, duna pay lain pang mga kanhi opisyal sa LTO-7 ang gikasohan og kriminal human gipasanginlan nga miwaldas sa kapin P23 ka milyon nga pundo sa maong ahensya.
Apil sa mga nag-atubang sa maong kaso ang mga natangtang na sa serbisyo nga sila si Gonzalo Baybay kanhi supervising transportation regulation office, Corazon Bascon kanhi OIC sa finance and management division nga nag- atubang og kaso sa Republic Act 3019 o Anti Graft and Corrupt Practices Act ug Malversation of Public Funds.
Sa gisumitir nga counter affidavit ni Leyson ug Maloloy-on, ang duha hugtanong mihimakak sa maong pasangil. – /EIM) (BANAT NEWS)
- Latest
