Lalaki milayat sa bridge patay
CEBU, Philippines – Usa ka lalaki nga giingong dunay daghang problema ang gikatahong milayat gikan sa Mandaue-Mactan Bridge sa habig sa dakbayan sa Lapu-Lapu ug nakit-ang patay na. Ang namatay human nilayat sa taytayan mao si Donald Gabato, 28, residente sa Lapu-Lapu Cottages sa Barangay Basak sa maong dakbayan.
Base sa imbestigasyon ni Police Officer 3 John Carlo Jocutan sa Lapu-Lapu City Police Office- Homicide Section napalgan si Gabato sa mga residente sa Sitio Camansi, Barangay Pajo.
Ang mga tawo mao nay mitawag sa mga awtoridad aron pagdala kang Gabato sa Lapu-Lapu District Hospital apan gideklarar kini sa mga doctor nga patay na. Sumala pa ni Jocutan, ang asawa ni Gabato nga si Margie daan nang mipasidaan nga posibleng molayat kini sa taytayan tungod sa kadaghan sa iyang gihunahuna nga problema karong mga panahona.
Matud pa sa asawa ngadto sa kapolisan, alas- 8 kagahapon sa buntag gibiyaan sa iyang bana ang ilang gamay nga tindahan ug wala gani kini gisirad-an hinungdan sa iyang kabalaka ug daling gipangita ang iyang bana.
Duna na lay mipahibalo kaniya nga nakit-an ang iyang bana sa mga barangay tanod sa dagat ug gidala kini sa tambalanan.
Nagtuo ang kapikas nga depresyon ang hinungdan kun nganong nahimo kadto sa iyang bana. Mitug-an usab kini sa kapolisan nga lima ka tuig nang nag-therapy ang bana tungod niini. – /EIM) (BANAT NEWS)
- Latest
