Drayber gidunggab sa dispatser

CEBU, Philippines – Sa prisohan nangalagkalag ang usa ka dispatser human niya dunggaba ang drayber sa taxi alas 9 pasado kagahapon sa buntag sa parkingan sa Jollibee, Cansaga, Consolacion.

Ang suspek mao si Rodulfo Narbuada, 59-anyos nga taga Pulpogan sa maong lungsod ug ang biktima mao si Lolito Pautan Simbajon, 40-anyos nga taga sitio Tagaytay, Calero, Liloan ug drayber sa Worldwide taxi nga nagdala sa plate number 7CAE 1500.

Si PO1 Jeofrey Cabataña sa Consolacion Police Station miingon nga gikan nagpakanaug og pasahero sulod sa parkingan ang biktima.

Ang suspek nga nakamatikod sa pagpadagan sa biktima sa taxi ang dali nga misinyas sa pagpahunong aron mangayo og sinsiyo. Giingong wala mohunong ang drayber nga gikasuko ni Narbuada hinungdan nga gikusog paghapak ang taxi ug nilugapak.

Gikasuko sa biktima ang paghapak sa dispatser nga nakaaghat kaniya paghunong ug masuk-anon nga giduol ang suspek dungan ang pagtukmod.

Ang dispatser nga nasuko na daan miibot og kutsilyo ug gidunggab sa makadaghan ang biktima. Si PO1 Michael Vlladar nga nahiagi sa maong dapit dali usab nga midakop sa suspek.

Gitanggong sa detention cell ang suspek ug ang biktima  gihatud sa Vicente Sotto Memorial Medical Center.  (BANAT NEWS)