Kalabera gigamit sa albularyo

CEBU, Philippines - Ang kalabera nga ulo sa tawo gipatong sa plato nga mao’y gigamit sa paghatag og sakit sa tawo nga gikaaway nga kun dili madali posible nga hinungdan sa kamatayon.

Kini ang paambit nga kasinatian ni Dadot Bentulan, 55-anyos, minyo nga usa ka panday sa lungsod sa Cordova.

Matud ni Bentulan nga nagsugod ang iyang kasinatian dihang usa niya ka silingan ang nagbaligya kaniya og traysikol sa kantidad nga P80 mil.

Natigayun kini pinaagi sa iyang pagbayad og P40 mil ug ang nahibilin nga katunga iyang bayran pinaagi sa data-data sulod sa unom ka buwan.

Dihang nagpadayon na ang iyang pagdata-data sa traysikol, wala niya damha nga nagkalisud siya sa kuwarta hinungdan nga nakapalta siya sa pagdata.

Giangkon ni Bentulan nga duha ka higayun nga napalta ang iyang pagdata hinungdan nga nagtinguha ang iyang silingan sa pagbawi sa traysikol.

Nagdumili gyud siya sa pag-uyon nga bawion gikan kaniya ang traysikol tungod kay alkanse siya ug P40 mil na lang ang ibalik ngadto kaniya.

Gumikan sa iyang pagbalibad nga kuhaon sa iyang silingan ang traysikol, wala lang sab damha nga gibati niya ang pagpanakit sa iyang mga lutahan nga maoy hinungdan sa kalit niyang pagniwang kay nawad-an man siya og gana sa kaon.

Gitug-an ni Bentulan nga nagpa-check-up siya sa doktor ug giresitahan na siya og mga tambal apan iyang namatikdan nga wala’y alibyo ang mga tambal nga giresita kaniyang tambal. Si Bentulan miingon nga ang lain niyang silingan nga nakamatikod sa iyang kahimtang mitambag kaniya sa pagdangop sa usa ka albularyo nga nagpuyo sa pikas barangay.

Matud ni Bentulan nga iyang gisanong ang  tambag sa iyang silingan ug didto sa maong albularyo niya masuta nga ang gihambin niyang balatian tungod sa nasuko niyang silingan nga mao’y tag-iya sa traysikol nga iyang gidata-datahan.

Giingong midagkot og kandila ang nasuko niyang silingan sa kalabera nga didto sulod sa lawak sa maong albularyo ug gi-ampo nga takboyan siya og dili masabot nga sakit-sakit sa kalawasan.

Aron makaangkon kini og kaayohan maoy gihimo usab ang pagdagkot ug nangayo og pasaylo uban sa hugot nga pag-ampo sa kalag nga maoy tag-iya sa kalabera. (BANAT NEWS)