Hubog nabitik sa sling bag patay

CEBU, Philippines -  Lalaki nga hubog napalgan na lang patay sa lugar nga kataposan niyang giimnan pasado alas- 5  kagahapon sa buntag sa Barangay Don Andres Soriano sa dakbayan sa Toledo.

Ang maong lalaki naila nga si Andres Sigla, 51, molupyo sa Barangay Awihaw sa nahisgotan nga dakbayan apan lumad sa maong barangay.

Base sa pasiunang imbestigasyon sa kapolisan nga ang maong lalaki nag-inom kauban sa iyang mga higala niadtong Huwebes sa gabii apan tungod sa kahubog miuna og pamauli ang iyang mga kainom.

Sumala pa nga gikombinsir pa unta kini nga pakuyogon na lang sa iyang pag-umangkon aron makapahulay og tarong apan nagmagahi kini tungod sa kahubog.

Nianang sayo sa buntag, ang tag-iya sa tindahan nga si Florentina Pinili nakabantay sa biktima nga naghigda sa bangko duol sa iyang tindahan apan wa na maglihok.

Dihang gisusi, nabantayan nga ang strap sa sling bag ni Sigla nasangit sa lansang nga migimaw sa lingkoranan ug nabitik ang liog niini.

Daling nangayo og tabang si Florentina apan sa pag-abot sa mga polis nasuta nga bugnaw na ug wa nay kinabuhi si Sigla ug gituohang natuok kini sa iyang sling bag tungod sa kahubog.

Nasayran usab sa kapolisan nga way kontra ang namatay diha sa maong dapit. Ang patay nga lawas ni Sigla girekomendar nga ipaubos sa autopsy aron masuta kung duna bay foul play ang iyang kamatayon. (BANAT NEWS)