Gipakuyog sa party gipusil

CEBU, Philippines – Usa ka panday sa BF Homes, Gun-ob, dakbayan sa Lapu-Lapu ang gipusil sa iyang higala ug kauban sa trabaho dihang giimbitar og usa ka party sa barangay Basak kagahapon sa buntag.

Si PO1 Jade Querubin, imbestigador sa Lapu-Lapu City Police Office  Homicide Section, miila sa biktima nga si Felix Quibrantar, 36-anyos, ug ang suspek  mao si Jesse Librando, 25-anyos.

Ang duha ka construction workers pulos lumad nga taga Villahermosa, Negros Oriental.

Sa wala pa nahitabo ang pagpamusil alas 5:30 sa kadlawon kagahapon, si Librando niadto sa bunkhouse ni Quibranta ug gihagad nga moadto og party ug kaon.

Nikuyog ang biktima sa wala’y pagduha-duha ug nisakay sa motorsiklo sa suspek.

Pag-abot nila sa Gaisano Grandmall sa Basak, si Librando gipauna og lakaw si Quibranta. Kalit nga nibunot sa wala matino nga kalibre sa armas si Librando ug dayon gipusil si Quibranta nga naigo sa likod nga bahin sa lawas.

Ang suspek daling niikyas samtang gidala sa Lapu-Lapu City District Hospital ang biktima. -/GMR) (BANAT NEWS)