LBC branches gipa- dad-an na’g notisya

CEBU, Philippines – Gihatud na kagahapon ni City Legal Officer Jerone Castillo ang suwat nga nag-require sa mga branch sa LBC sa pagbutang og security measures sama sa gwardiya ug closed-circuit television cameras. Gibutyag ni Castillo nga sobra sa 20 ka branches sa LBC nga walay mga security guard ang padalhan nila sa nahisgutang suwat.

Apan nabantayan nga ang kaniadtong mga branch sa LBC nga walay security guards gipamutangan na og security guards.

Ang subject sa maong suwat mao ang “Notice to Institute Security Measures, Explain, and Revoke Business Permit.” Gipasabot ni Castillo nga hatagan usab nila og “due process of law” ang nahisgutang mga establisamento.

Matud ni Castillo nga sulod sa tulo ka adlaw ang ihatag nga panahon sa establisamento gikan sa pagkadawat nila sa maong suwat sa pagtuman sa security measure. Gipasabot ni Castillo nga bisan og kadtong branch sa LBC nga mibutang na og security measures hatagan gihapon nila kini sa maong notice aron masiguro gyud nga mituman na kini.

Ang dakbayan sa Sugbo aduna kini sobra sa 30 ka LBC branches, apan kadtong naa sa mga malls dili ilakip sa maong notisya.

Ang maong notisya resulta sa sunod-sunod nga tulis sa branches sa LBC sa Sugbo nga wala ikahimuot ni Mayor Michael Rama kinsa miluwat og pamahayag nga temporaryong ipasira ang mga branches nga walay security measures.

Si Rama nanghinaot karon nga matagad sa konseho sa siyudad ang pag-institutionalize sa pagbutang og security measures sa tanang mga establisamento sa siyudad.

“If you are in business be mindful of peace and order that you are a part to be responsible so that it will come a very peaceful business community or environment,” ni Rama pa. -/EIM) (BANAT NEWS)